رەسەي دۇنيەجۇزىلىك كوشپەندىلەر ويىندارىن وتكىزۋ مۇمكىندىگىن قاراستىرۋدا، دەپ حابارلايدى "ادىرنا" ۇلتتىق پورتالى. بۇل تۋرالى تاسس اگەنتتىگىندە وتكەن ءباسپاسوز ءماسليحاتىندا رەسەيدىڭ ۇلتتىق جانە وليمپيادالىق ەمەس سپورت تۇرلەرى كوميتەتىنىڭ ۆيتسە-پرەزيدەنتى يگور پاۆليۋك ايتتى.
بيىلعى قازاقستاندا وتكەن كوشپەندىلەر ويىندارىندا رەسەي قۇراماسى جالپى مەدالدار سانى بويىنشا ءۇشىنشى ورىندى يەلەندى. ويىندار ەكى جىلدا ءبىر رەت وتەدى. كەلەسى ويىنداردى قىرعىزستان قابىلدايدى.
"بىزدە ويلانۋعا ۋاقىت بار، - دەدى پاۆليۋك، - ويىنداردى وتكىزۋ قۇقىعىنا يە بولماس بۇرىن، رەتتەۋ دەڭگەيىندە تۇرعان بىرقاتار ماسەلەلەردى شەشۋ كەرەك. ءبىز ارينە دايىنبىز، ەگەر رەسەيدە قانداي دا ءبىر ءىس-شارا وتكىزىلەتىن بولسا جاستار ايتقانداي ول ارقاشان وۆەرتوپ بولاتىنى ءسوزسىز" دەيدى ول.
مەملەكەتتىك دۋمانىڭ ۇلتتار ىستەرى جونىندەگى كوميتەتى توراعاسىنىڭ ءبىرىنشى ورىنباسارى يلدار گيلمۋتدينوۆ دۇنيەجۇزىلىك كوشپەندىلەر ويىندارى كەزىندە «بىرقاتار رەسپۋبليكالاردىڭ جوعارى لاۋازىمدى تۇلعالارى قازاقستانعا كەلىپ، كىرۋ پەرسپەكتيۆالارىن تالقىلادى» دەپ اتاپ ءوتتى.
ەسكە سالا كەتەيىك، بيىل بەسىنشى دۇنيەجۇزىلىك كوشپەندىلەر ويىندارى استانا قالاسىندا ءوتتى. قازاقستاننىڭ ۇلتتىق قۇراماسى 44 التىن، 33 كۇمىس، 37 قولا جۇلدە الىپ، كوماندالىق ەسەپتە ءبىرىنشى ورىنعا يە بولدى.
