«ادىرنا» ۇلتتىق پورتالىندا “الماتى وبلىسى سوت عيماراتىن 5 ايعا جالداۋ ءۇشىن 50 ميلليوننان استام تەڭگە قارجى ءبولدى” دەگەن سىني ماقالا جاريالانعان ەدى. سول ماتەريالدا كوتەرىلگەن ماسەلەرگە قاتىستى وبلىستىق سوت رەسمي جاۋاپ بەردى، دەپ حابارلايدى «ادىرنا» ءتىلشىسى.
ءبىز اتالعان ماقالادا الماتى مەن جەتىسۋ وبلىستارى ءبولىنىپ، وبلىس ورتالىعى قوناەۆ قالاسىنا كوشكەلى بەرى مەملەكەتتىك مەكەمەلەردىڭ دەنى كەڭسەلەردى جالعا الىپ وتىرعانىن، ماسەلەن الماتى وبلىسىنىڭ سوت اكىمشىلىگى الداعى بار بولعانى بەس ايعا 2273,7 شارشى مەتردەن كەم ەمەس اۋقىمداعى اكىمشىلىك عيماراتتى (20 ادامعا دەيىن سىيىمدىلىعى بار زالى، 1 ءماجىلىس زالى، ۆاننا بولمەلەرى، 2 سوت توراعاسى، 3 القا توراعالارى، 20 سۋدياعا ارنالعان كابينەتتەرى بار) جالداۋ ءۇشىن قازىنا قارجىسىنان 50 752 232 تەڭگە قارجى جۇمساعالى جاتقانىن جازعان ەدىك.
سونداي-اق، وبلىستىق سوتقا رەسمي حات جازىپ، وبلىس بولىنگەن ەكى جىلدان استام ۋاقىتتا سوت اكىمشىلىگى عيمارات جالداۋعا بيۋدجەت قارجىسىنان قانشا اقشا شىعىنداعانىن، بۇل ءۇردىس قاشانعا دەيىن جالعاساتىنىن، عيماراتتى جالعا الۋعا كەتكەن قارجىمەن مەملەكەتتىك مەكەمەگە عيمارات سوعىپ الۋعا نە كەدەرگى ەكەنىن سۇراپ حات جولداعانبىز.
الماتى وبلىستىق سوتى ءبىز جولداعان بىرنەشە سۇراققا قىسقاشا جاۋاپ قايىرىپتى. قاراڭىز (حات ءماتىنىن وزگەرتپەي ۇسىنامىز):
“الماتى وبلىسى قوناەۆ قالاسى الەۋمەتتىك-ەكونوميكالىق دامىتۋدىڭ 2023 – 2027 جىلدارعا ارنالعان كەشەندى جوسپارىنا سايكەس الماتى وبلىستىق سوتى مەن دەپارتامەنتىنە عيماراتىن سالۋ جەرگىلىكتى اتقارۋشى ورگاندارىمەن جوسپارلانۋدا. بۇگىنگى تاڭدا، قالا اكىمدىگى تاراپىنان الماتى-وسكەمەن اۆتوموبيل جولىنىڭ بويىندا ورنالاسقان جەر ۋچاسكەلەرى ءبولىندى، ولار بويىنشا وسى وبەكتىلەردىڭ قۇرىلىسى جوسپارلانىپ، "الماتى وبلىسىنىڭ قۇرىلىس باسقارماسى" مەن "كومپانيا سترويتەكس" جشس جوبالاۋ ۇيىمى اراسىندا جوعارىدا اتالعان وبەكتىلەر بويىنشا جوبالاۋ-سمەتالىق قۇجاتتامانى ازىرلەۋگە شارتتار جاسالدى. جوبالاردى ىسكە اسىرۋ رەسپۋبليكالىق جانە جەرگىلىكتى بيۋدجەت ەسەبىنەن 2025-2026 جىلدارعا جوسپارلانىپ وتىر. جوبالاۋ-سمەتالىق قۇجاتتامانىڭ اياقتالۋ مەرزىمى 2024 جىلعى 3-توقسان. قازىرگى ۋاقىتتا جۇمىس جوباسىن ازىرلەۋ جۇمىستارى اياقتالۋدا،-” دەلىنگەن.
قوش! جاۋاپتان ۇققانىمىز الماتى وبلىستىق سوتى ءبىز قويعان ناقتى سۇراقتاردى اينالىپ ءوتىپ، تەك سوت عيماراتىنىڭ 2027 جىلعا دەيىن ايتەۋىر ءبىر سالىناتىنىن تىلگە تيەك ەتىپتى. وبلىس بولىنگەن ەكى جىلدىڭ ىشىندە عيمارات جالداۋعا قانشا قارجى شىعىن بولعانى تۋرالى جاق اشپاپتى. رەسمي جاۋاپتا ماقالادا كوتەرىلگەن سوت عيماراتىن بەس ايعا جالداۋعا بولىنگەن 50 ميلليون تەڭگەدەن استام قارجى تۋرالى دا ەشتەڭە ايتىلماعان. دەمەك، وبلىستىق سوت جاي عيمارات ءۇشىن اينالدىرعان بەس ايعا ميلليونداردى شاشىپ جاتقانىن جوققا شىعارعان جوق!
2027 جىلعا دەيىن ءالى ءۇش جىل بار. ياعني، 36 اي! جوعارىداعى 50 752 233 تەڭگەنى بەسكە بولسەڭىز 10 150 446 تەڭگەنىڭ، سوت عيماراتىن ايلىق جالداۋ قۇنىنىڭ توبەسى كورىنەدى. دەمەك، الماتى وبلىسىنىڭ سوتى الداعى ءۇش جىلدا تەك عيماراتتى جالداۋ ءۇشىن حالىق قازىناسىنان 365 416 070 تەڭگە قارجى جۇمسايدى دەگەن ءسوز.
ءبىز وبلىسقا قاتىستى ءبىر عانا مەملەكەتتىك مەكەمەنىڭ جاعدايىن ءسوز ەتىپ وتىرمىز. الماتى وبلىسىنىڭ باسقا مەكەمەلەرى بيۋدجەتتىڭ قانشا قارجىسىن اۋەگە شاشىپ جاتقانى بەلگىسىز.
اسىل اباي
ادىرنا ۇلتتىق پورتالى
