پاۆلودار وبلىسى مايقايىڭالتىن كەن ورنىندا وپات بولعان قۇتقارۋشىنىڭ وتباسى جۇمىس بەرۋشىدەن 120 ملن تەڭگە ءوندىرىپ الدى. بۇل تۋرالى كەشە، 5 قىركۇيەك سوت ۇكىمى شىقتى، دەپ حابارلايدى “ادىرنا” ۇلتتىق پورتالى.
ايتا كەتسەك، بيىل 4 قاڭتاردا "مايقايىڭالتىن" اق اۋماعىنداعى بولجامدى ءورت ورنىنا تەحنولوگيالىق جولمەن كەلە جاتقاندا ءۇش قۇتقارۋشى مەن جۇرگىزۋشىسى بار اۆتوبۋس شۇڭقىرعا قۇلاپ كەتكەن ەدى.
قازا تاپقاندار — "كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى" جشس قىزمەتكەرلەرى.
وسى فاكتى بويىنشا قۇرامىندا توتەنشە جاعدايلار مينيسترلىگى، پاۆلودار وبلىسىنىڭ اكىمدىگى، مەملەكەتتىك ەڭبەك ينسپەكتورى، "مايقايىڭالتىن" اق، "كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى" جشس-نەن قۇرالعان كوميسسيا جازاتايىم وقيعاعا تەكسەرۋ جۇرگىزىپ، ونىڭ قورىتىندىسى بويىنشا جۇمىس بەرۋشىنىڭ كىناسى — 100%، جۇمىسكەرلەردىڭ كىناسى مۇلدە جوق ەكەنى انىقتالدى.
قايتىس بولعان قۇتقارۋشى ت-نىڭ اناسى، قىزى، ۇلى جانە اپكەسى مارقۇمنىڭ قىزمەتتىك مىندەتتەرىن اتقارۋ كەزىندە قايتىس بولۋىنا بايلانىستى مورالدىق زالال وتەۋدى تالاپ ەتىپ سوتقا جۇگىندى.
مورالدىق زيان ولاردىڭ ۇلىنان، اكەسىنەن، اعاسىنان ايىرىلۋىنىڭ اۋىرلىعىنان، جەرلەۋ كەزىندە ونىمەن قوشتاسۋعا مۇمكىندىك بولماۋىنان، جۇمىس بەرۋشىنىڭ كوڭىل ايتىپ، قولداۋ كورسەتپەۋىنەن بولىپ وتىر.
سوت بولعان جازاتايىم وقيعاعا جۇمىس بەرۋشىنىڭ 100% كىناسىن نەگىزگە الا وتىرىپ، قايتىس بولعان قۇتقارۋشىنىڭ تۋىستارىنىڭ تالاپتارىن تولىق كولەمدە قاناعاتتاندىرىپ، ءاربىر تۋىسىنىڭ پايداسىنا قويىلعان تالاپ كولەمىندە 30 000 000 تەڭگەدەن، جالپى سوماسى 120 ملن تەڭگە مورالدىق زيان ءوندىردى.
شەشىم زاڭدى كۇشىنە ەنگەن جوق.
