سولتۇستىك كورەيا شىلدە ايىنىڭ سوڭىندا بولعان جويقىن سۋ تاسقىنى ءۇشىن كىنالى دەپ تانىلعان 20-30 شەنەۋنىكتى ءولىم جازاسىنا كەستى. بۇل تۋرالى TV Chosun وڭتۇستىك كورەيالىق شەنەۋنىكتىڭ سوزىنە سىلتەمە جاساپ جاريالادى، دەپ حابارلايدى “ادىرنا” ۇلتتىق پورتالى.
وڭتۇستىك كورەيا ارناسىنىڭ اتىن اتاماعان دەرەككوزىنىڭ حابارلاۋىنشا، شەنەۋنىكتەر سۋ تاسقىنىنان «زالالدىڭ الدىن الماعانى» ءۇشىن ءولىم جازاسىنا كەسىلگەن.
كحدر-عا ارنالعان NK News پورتالى وڭتۇستىك كورەيانىڭ ۇلتتىق بارلاۋ قىزمەتىنىڭ (NIS) ءباسپاسوز قىزمەتىنە سىلتەمە جاساپ، سەۋل بولجامدى ءولىم جازاسىنا قاتىستى جاعدايدى «ءجىتى باقىلاپ وتىر» دەپ جازادى.
Yonhap اگەنتتىگىنىڭ مالىمدەگەندەي، سولتۇستىك كورەيا كوشباسشىسى كيم چەن ىن شىلدە ايىنىڭ سوڭىندا چاگاندو جانە پحەنگان-بۋك-دو پروۆينتسيالارىنداعى نوسەر جاڭبىردان كەلگەن شىعىن ءۇشىن شەنەۋنىكتەردى جازالايتىنىن ايتقان.
وڭتۇستىك كورەيا اقپارات قۇرالدارى كحدر-دا سۋ تاسقىنى سالدارىنان قازا تاپقاندار نەمەسە ءىز-ءتۇزسىز جوعالعاندار سانى 1 مىڭ ادامنان اسۋى مۇمكىن دەپ حابارلادى. الايدا، كيم چەن ىن مۇنداي دەرەكتەردى «ويدان شىعارىلعان»، ال وڭتۇستىك كورەيالىق باق-تى «قوقىس» دەپ اتادى.
كحدر بيلىگى نوسەر جاڭبىر مەن سۋ تاسقىنىنان زارداپ شەككەن 15 مىڭنان استام ادامدى ەل استاناسى پحەنيانعا ەۆاكۋاتسيالاۋعا ءماجبۇر بولدى، دەپ حابارلادى سولتۇستىك كورەيانىڭ KCNA اقپارات اگەنتتىگى.
