جامبىل وبلىسىنا قاراستى مويىنقۇم اۋدانىنىڭ اكىم اپپاراتى سايلاۋ كەزىندە داۋىس بەرۋگە ارنالعان جاشىكتەردى ساتىپ الۋعا تەندەر جاريالادى، دەپ حابارلايدى ادىرنا ۇلتتىق پورتالى goszakup.gov.kz سايتىنا سىلتەمە جاساپ.
مەملەكەتتىك ساتىپ الۋ تۋرالى حابارلاما 12 تامىز كۇنى "جاشىك داۋىس بەرۋگە ارنالعان" دەگەن تاقىرىپپەن جاريالانعان. جەڭىمپاز كومپانيا 19 تامىز كۇنى انىقتالادى. تەحنيكالىق سيپاتتاماعا قاراعاندا اۋداندىق بيۋدجەتتەن بولىنگەن 1 033 750 تەڭگەگە تەندەر جەڭىمپازى پارامەترى 900*500*500مم2 بولاتىن ەكى دانا، پارامەترى 400*300*300 مم2 بولاتىن 16 دانا داۋىس بەرۋگە ارنالعان جاشىكتەر جاساپ بەرۋى كەرەك. ياعني، تاپسىرىس ورىنداۋشى 18 دانا داۋىس بەرۋگە ارنالعان جاشىكتى 15 كۇننىڭ ىشىندە مويىنقۇم اۋىلىنا جەتكىزەدى. ورگانيكالىق شىنىدان نەمەسە اكريل ماتەريالىنان جاسالعان ءار جاشىكتىڭ قۇنى ورتاشا ەسەپپەن 57 مىڭ تەڭگەنى قۇرايدى.
سايلاۋ - مەرزىمدىك ناۋقان. داۋىس بەرۋگە ارنالعان جاشىكتەر ەسكىرىپ توزاتىن، ءبۇلىنىپ بۇزىلاتىن دۇنيە ەمەس. ءبىزدى "مويىنقۇم اۋدانىندا بۇعان دەيىن داۋىس بەرۋگە ارنالعان جاشىكتەر بولمادى ما؟" دەگەن ساۋال مازالايدى. "بولسا، ولار قايدا؟". اۋدان ءار سايلاۋ سايىن جاڭا جاشىككە تاپسىرىس بەرىپ، مەملەكەت قارجىسىن وڭدى-سولدى شاشا بەرە مە؟
بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى دا جاريالايتىن بولامىز.
اباي اسىل
ادىرنا ۇلتتىق پورتالى
