بۇعان دەيىن ەكس-پرەزيدەنت نۇرسۇلتان نازارباەۆتىڭ قىزى ءاليا نازارباەۆانىڭ رەيدەرلىك ارەكەتى تۋرالى اشكەرەلەگەن كاسىپكەر نۇرلان بيمۋرزين ءوزىنىڭ ۇيىنە باسىپ كىرۋ ارەكەتى تۋرالى مالىمدەدى، دەپ حابارلايدى “ادىرنا” ۇلتتىق پورتالى.
«وقيعا 16-سى كۇنى تۇنگى ساعات 01.30-دا بولدى. ءبىزدىڭ پودەزد جابىق تۇرادى، ءوزىنىڭ كودى بار. بۇل ۇيدە مەن جانە مەنىڭ وتباسىمنان باسقا ەشكىم تۇرمايدى، جان-جاقتا قالعانى تەك كەڭسەلەر عانا. ولاردىڭ بارلىعىندا جەكە كىرۋ كودى بار. ءومىرىمنىڭ، دەنساۋلىعىمنىڭ جانە وتباسىمنىڭ قاۋىپسىزدىگى ءۇشىن پەريمەتردىڭ اينالاسىنا، كىرەبەرىستىڭ ۇستىنە جانە پاتەرىمنىڭ ۇستىندەگى كىرەبەرىسكە كامەرالار ورناتتىم. ساعات 01.30-دا بەلگىسىز بىرەۋ كىرىپ، بەينەباقىلاۋ كامەرالارىنىڭ كابەلدەرىن مۇقيات تەكسەرە باستايدى، اينالاعا قاراپ، كەيىن كەتىپ قالادى»، - دەيدى نۇرلان بيمۋرزين.
ول بۇل ءاليا نازارباەۆانىڭ ءىسى بولۋى مۇمكىن دەپ كۇدىكتەنەدى. دەگەنمەن، تىكەلەي دالەل جوق. بيمۋرزين جاعدايعا قاتىستى پوليتسيا شاقىردى. بيمۋرزينگە بەرىلگەن تالون بويىنشا 16 شىلدەدە پوليتسيا ارىزدى قابىلداپ، ماتەريالداردى سوتقا دەيىنگى تەرگەپ-تەكسەرۋدىڭ بىرىڭعاي رەەسترىنە تىركەگەنى ايتىلادى.
ەسكە سالايىق، بيمۋرزين 28 اقپاندا سەرىكتەسى قاليەۆ ەكەۋى نازارباەۆا مەن روگوۆانىڭ رەيدەرلىك شابۋىلىنىڭ قۇربانى بولعانىن حابارلاعان بولاتىن.
