قازاقستاندا پرەزيدەنت جانىنداعى راقىمشىلىق جاساۋ كوميسسياسىنىڭ قۇرامى وزگەردى. مەملەكەت باسشىسىنىڭ ءتيىستى جارلىعى نورماتيۆتىك قۇقىقتىق اكتىلەردىڭ اقپاراتتىق-قۇقىقتىق جۇيەسىندە جاريالاندى، - دەپ حابارلايدى "ادىرنا" ۇلتتىق پورتالى.
قازاقستان پرەزيدەنتى قاسىم-جومارت توقاەۆتىڭ 2024 جىلعى 2 شىلدەدەگى جارلىعىمەن "قازاقستان رەسپۋبليكاسى پرەزيدەنتىنىڭ جانىنداعى راقىمشىلىق جاساۋ ماسەلەلەرى جونىندەگى كوميسسيا تۋرالى" قازاقستان رەسپۋبليكاسى پرەزيدەنتىنىڭ 2006 جىلعى 5 شىلدەدەگى № 140 جارلىعىنا مىنا وزگەرىستەر ەنگىزۋدى قاۋلى ەتتى:
— جوعارىدا اتالعان جارلىقپەن بەكىتىلگەن قازاقستان رەسپۋبليكاسى پرەزيدەنتىنىڭ جانىنداعى كەشىرىم جاساۋ جونىندەگى كوميسسيانىڭ قۇرامىنا قازاقستان رەسپۋبليكاسى پارلامەنتى سەناتىنىڭ دەپۋتاتى جاننا بەيسەنتايقىزى اسانوۆا (كەلىسىم بويىنشا), زاڭ عىلىمدارىنىڭ دوكتورى ينديرا ورالقىزى اۋباكىروۆا (كەلىسىم بويىنشا) ەنگىزىلسىن;
— اتالعان كوميسسيا قۇرامىنان ا. ي. لۋكين مەن ت.ە.قاۋدىروۆ شىعارىلسىن.
جارلىق قول قويىلعان كۇنىنەن باستاپ كۇشىنە ەندى.
قازاقستان رەسپۋبليكاسى پرەزيدەنتىنىڭ جانىنداعى راقىمشىلىق جاساۋ ماسەلەلەرى جونىندەگى كوميسسيا كەشىرىم جاساۋ تۋرالى ماتەريالداردى الدىن الا قاراۋ ءۇشىن 1992 جىلعى 25 قاڭتاردا قۇرىلعان جانە مەملەكەت باسشىسى جانىنداعى كونسۋلتاتيۆتىك-كەڭەسشى ورگان بولىپ تابىلادى.
ەسكە سالا كەتەيىك، بۇعان دەيىن قازاقستان پرەزيدەنتى جانىنداعى راقىمشىلىق كوميسسياسى ۇقك ەكس-باسشىسى كارىم ءماسىموۆتىڭ ءوتىنىشىن كەرى قايتارعان بولاتىن. بۇل تۋرالى كوميسسيا مۇشەسى مارات ءباشىموۆ مالىمدەگەن بولاتىن. ونىڭ ەسىمى جوعارىداعى قۇرامنان شىعۋ تۋرالى تىزىمدە اتالمادى.
