يراننىڭ ونعا جۋىق قالاسىندا، ونىڭ ىشىندە تەگەراندا تۇرعىندار زەينەتاقى مەن باسقا دا الەۋمەتتىك تولەمدەردى كوبەيتۋدى، سونداي-اق ەڭبەك جاعدايىن جاقسارتۋدى تالاپ ەتكەن شەرۋلەر وتكىزدى. بۇل تۋرالى Iran International جاريالادى، دەپ حابارلايدى “ادىرنا” ۇلتتىق پورتالى.
نارازىلىق شەرۋلەرى جەكسەنبى، 7 شىلدە رەفورماتور ماسۋد پەزەشكياننىڭ (پەزەشكيان) جەڭىسىمەن اياقتالعان كەزەكتەن تىس پرەزيدەنت سايلاۋىنىڭ ەكىنشى تۋرى اياسىندا ءوتتى. شەرۋگە زەينەتكەرلەر مەن بۇرىن مۇناي-حيميا كاسىپورىندارىندا جۇمىس ىستەگەن جۇمىسسىزدار شىقتى.
نارازىلىق بىلدىرۋشىلەر زەينەتاقى مەن جاردەماقىنى كەدەيلىك شەگىنىڭ ناقتى دەڭگەيىنە دەيىن كوتەرۋدى، تەگىن جانە ساپالى مەديتسينالىق قىزمەت كورسەتۋدى، جۇمىس ورنىن قامتاماسىز ەتۋدى جانە جالاقىنى كوتەرۋدى تالاپ ەتتى.
بۇعان قوسا، بىرنەشە ۇزاققا سوزىلعان ەرەۋىلدەر تۋرالى حابارلاندى. ەلدىڭ سولتۇستىگىندەگى رۋدباردا سۋمەن جابدىقتاۋشىلار سەگىز ايلىق جالاقى قارىزىن تولەۋدى تالاپ ەتىپ، نارازىلىق تانىتۋدا. يراننىڭ وڭتۇستىگىندە جەلتوقسان ايىنان بەرى اقشا الماعان مۇناي-گاز كومپانيالارىنىڭ قىزمەتكەرلەرى دە ەرەۋىل ارقىلى ماسەلەسىن شەشپەك.
نارازىلىق بىلدىرۋشىلەر جالاقى بەرەشەگىن جابۋمەن قاتار، تاۋەلسىز كاسىپوداقتاردى قۇرۋدى جانە سالاداعى «قاناۋشى مەردىگەرلەردى» جويۋدى تالاپ ەتۋدە. سوڭعى ون جىلدا مۇناي-گاز سەكتورى دەلدال رەتىندە ارەكەت ەتەتىن كۇشتى مەملەكەتتىك شەنەۋنىكتەرگە اۋتسورسينگكە بەرىلگەنى ناقتىلاندى. وسىدان كەيىن جالاقىنى قىسقارتۋ جانە ەڭبەك جاعدايلارىن كۇشەيتۋ باستالدى.
بۇقارالىق اقپارات قۇرالدارىنىڭ حابارلاۋىنشا، يران بۇرىن-سوڭدى بولماعان ەكونوميكالىق داعدارىستى باستان كەشۋدە. جىلدىق ينفلياتسيا شامامەن 50%-دى قۇرايدى. ەڭ تومەنگى جالاقى دوللار ەكۆيۆالەنتىندە $190 قۇرايدى، بۇل ەل تۇرعىندارىن كۇنكورىس قامىمەن كۇرەسۋگە ءماجبۇر ەتەدى. تەگەرانداعى كۇنكورىس دەڭگەيى شامامەن $500, باسقا قالالاردا $350 قۇرايدى.
كەيبىر شەرۋشىلەر يسلام رەسپۋبليكاسى بيلىگىنەن كاسىپوداق بەلسەندىسى شاريفا موحامماديگە شىعارىلعان ءولىم جازاسىن جويۋدى دا تالاپ ەتىپ جاتقانى اتاپ ءوتىلدى. كوپشىلىك ايەلدەر تەك باتىل مالىمدەمەلەرى مەن ۇكىمەتتى سىناعانى ءۇشىن عانا قۋدالانادى دەپ ەسەپتەيدى.
