قازاقستاننىڭ توتەنشە جاعدايلار مينيسترلىگى قىرعىزستانعا سەلدەن قازا تاپقان بالالاردى تاسىمالداۋ ءۇشىن بورت جىبەرمەك، دەپ حابارلايدى “ادىرنا” ۇلتتىق پورتالى ۆەدومستۆونىڭ ءباسپاسوز قىزمەتىنە سىلتەپ.
«بارلىق قاجەتتى ۇيلەستىرۋ جانە اقپارات الماسۋ جۇمىستارى جۇرگىزىلۋدە. قازا تاپقانداردىڭ مايىتتەرىن تاسىمالداۋ ءۇشىن قازاقستاننىڭ توتەنشە جاعدايلار مينيسترلىگى وش قالاسىنا ۇشاق جونەلتۋ ماسەلەسىن قاراستىرۋدا»، - دەلىنگەن حابارلامادا.
قىرعىزستاننىڭ توتەنشە جاعدايلار مينيسترلىگىنىڭ حابارلاۋىنشا، وش وبلىسى نووكات اۋدانى ابشىر-اتا اۋىلىندا سەل سالدارىنان كامەلەتكە تولماعان ەكى قازاقستان ازاماتى قازا تاپقان. تاعى ەكەۋى ءىز-ءتۇزسىز جوعالعان دەپ ايتىلدى.
ولاردى قىرعىزستاننىڭ قۇتقارۋشىلارى ىزدەستىرىپ جاتىر.
«قازاقستاندىق ديپلوماتتار جەرگىلىكتى بيلىكپەن تۇراقتى بايلانىستا. ءبىزدىڭ قىرعىزستانداعى ەلشىلىگىمىز قايتىس بولعان بالالاردىڭ تۋىستارىنا بارلىق قاجەتتى كومەكتى كورسەتەدى. بۇل قايعىلى وقيعا قازاقستان رەسپۋبليكاسى سىرتقى ىستەر مينيسترلىگىنىڭ ەرەكشە باقىلاۋىندا»، - دەپ حابارلادى قازاقستان رەسپۋبليكاسى سىرتقى ىستەر مينيسترلىگى.
قر ءمينيسترى مۇرات نۇرتىلەۋ ارىپتەسى مينيستر جەەنبەك قۇلىباەۆقا تەلەفون شالدى. ولار توتەنشە جاعدايدىڭ ءمان-جايىن جانە ەكى ەلدىڭ ءتيىستى مەملەكەتتىك ورگاندارىنىڭ ءوزارا ءىس-قيمىلىن تالقىلادى.
