الماتىدا جولاۋشىلار اۆتوبۋسى اپاتقا ۇشىراپ، 16 ادام جاراقاتتانىپ، ءبىر ادام قازا تاپتى، - دەپ حابارلايدى “ادىرنا” ۇلتتىق پورتالى.
كادرلارعا قاراعاندا، اۆتوبۋس اۋەلى جەڭىل كولىكپەن سوقتىعىسىپ، جولدان شىعىپ كەتىپ، «ىشىمدىك بازارىنىڭ» جانىنداعى دۇڭگىرشەككە سوعىلعان.
وقيعا ورنىندا پوليتسيا قىزمەتكەرلەرى مەن قۇتقارۋشىلار جۇمىس ىستەپ جاتىر.
الماتى قالالىق ءىىد ءباسپاسوز قىزمەتىنىڭ الدىن الا مالىمەتى بويىنشا، «كيا» كولىگىنىڭ جۇرگىزۋشىسى ماقاتاەۆ كوشەسىمەن وڭتۇستىك باعىتتا ءوتىپ بارا جاتىپ، «سيتي-Bus» جشس جەكە تاسىمالداۋشىسى قىزمەت كورسەتەتىن 18-باعىتتاعى اۆتوبۋسپەن سوقتىعىسقان.
وقيعا سالدارىنان اۆتوبۋستىڭ 16 جولاۋشىسى مەديتسينالىق كومەككە جۇگىنسە، تاعى ءبىر جولاۋشى وقيعا ورنىندا كوز جۇمدى.
ادام ولىمىنە اكەلگەن جول-كولىك وقيعاسى بويىنشا قىلمىستىق ءىس قوزعالدى.
