ارمەنيا 21 ماۋسىم كۇنى الماتىدا وتەتىن ۇقشۇ سىرتقى ىستەر مينيسترلەرى كەڭەسىنىڭ وتىرىسىنا قاتىسپايدى. بۇل تۋرالى ەلدىڭ سىرتقى ىستەر مينيسترلىگىنىڭ ءباسپاسوز حاتشىسى اني باداليان ايتتى، دەپ حابارلايدى «ادىرنا» ءتىلشىسى.
«ارمەنيانىڭ سىرتقى ىستەر ءمينيسترى ارارات ميرزويان الماتىدا وتەتىن ۇقشۇ سىرتقى ىستەر مينيسترلەرى كەڭەسىنىڭ وتىرىسىنا قاتىسپايدى»،- دەدى ول جەرگىلىكتى باق-قا بەرگەن سۇقباتىندا.
ارمەنيا وسىعان دەيىن دە بىرنەشە رەت وتكەن ۇقشۇ قاۋىپسىزدىك كەڭەسىنىڭ وتىرىسىنا قاتىسۋدان باس تارتقان ەدى. 12 ماۋسىمدا پرەمەر-مينيستر نيكول پاشينيان ەلدىڭ ۇقشۇ-دان شىعۋ نيەتىن راستادى.
ايتا كەتەيىك، ۇجىمدىق قاۋىپسىزدىك تۋرالى شارت ۇيىمىنا قاتىسۋشى ەلدەردىڭ سىرتقى ىستەر مينيسترلەرى 21 ماۋسىمدا الماتىعا ءسىم كەڭەسىنىڭ وتىرىسىنا قاتىسۋ ءۇشىن كەلەدى. ءسىم باسشىلارى حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرىن تالقىلاماق. سونداي-اق ولار ۇقشۇ-عا توراعالىق ەتۋ كەزەڭىندە قازاقستاننىڭ باسىمدىقتارىن ورىنداۋ جونىندەگى ءىس-شارالاردى ىسكە اسىرۋدى قاراستىرادى.
