16 ماۋسىم تۇرمىستىق زورلىق-زومبىلىق تۋرالى زاڭ كۇشىنە ەنگەن كۇنى زاڭعا قارسى پەتيتسيا پايدا بولدى. بۇل تۋرالى epetition.kz پورتالىندا جاريالاندى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، پەتيتسيا اۆتورلارى ايەلدەر قۇقىعى مەن بالالاردىڭ قاۋىپسىزدىگىنە قاتىستى زاڭدارعا توسقاۋىل قويۋدى تالاپ ەتتى.
اۆتورلار قابىلدانعان زاڭ داستۇرلى تاربيە بەرۋ ۇدەرىسىن كريميناليزاتسيالايدى، بيلىك ازاماتتاردىڭ جەكە ىستەرىنە ارالاسادى، ال اتا-انالاردىڭ كوپشىلىگى سونىڭ كەسىرىنەن ايىپپۇل تولەپ، ەسەپكە الىنىپ، ءتىپتى اتا-انا قۇقىعىنان ايىرىلادى دەپ سانايدى.
“مەن قازاقستاندا زورلىق-زومبىلىقپەن كۇرەسۋ دەگەن جەلەۋمەن اتا-انانى كىنالى ەتەتىن پرەزۋمپتسياعا جول بەرەتىن، اتا-انانىڭ بەدەلىن تۇسىرەتىن زاڭنىڭ ورىندالۋىنا قارسىمىن. اتا-انالار – لوببيستىك قىلمىسكەرلەر ەمەس. بۇل زاڭدى بۇعاتتاۋدى تالاپ ەتەمىن”، دەلىنگەن پەتيتسيا ماتىنىندە.
سونداي-اق پەتيتسيا اۆتورلارى جاۋاپكەرشىلىك «بالالاردى ءداستۇرلى ەمەس جىنىستىق وريەنتاتسياعا بەيىمدەۋ» ءۇشىن جاسالعان دەپ سانايدى.
ايتا كەتەيىك، 16 ماۋسىم كۇنى قازاقستاندا ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى زاڭ كۇشىنە ەندى.
