قۋانىشبەك ەسەكەەۆ مەملەكەت باسشىسى قاسىم-جومارت توقاەۆتىڭ كەڭەسشىسى بولىپ تاعايىندالدى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
«مەملەكەت باسشىسىنىڭ وكىمىمەن قۋانىشبەك باقىتبەكۇلى ەسەكەەۆ قازاقستان رەسپۋبليكاسى پرەزيدەنتىنىڭ كەڭەسشىسى لاۋازىمىنا تاعايىندالدى»، – دەلىنگەن حابارلامادا.
ايتا كەتەيىك، بۇگىن قۋانىشبەك ەسەكەەۆتىڭ تۋعان كۇنى. ول 1975 جىلى 10 ماۋسىمدا الماتى قالاسىندا دۇنيەگە كەلگەن.
1995 جىلى ءال-فارابي اتىنداعى قازاق مەملەكەتتىك ۋنيۆەرسيتەتىنىڭ قولدانبالى ماتەماتيكا ماماندىعى بويىنشا ءبىتىردى.
2001 – 2002 جىلدارى قازاق مەملەكەتتىك باسقارۋ اكادەمياسىنىڭ مەنەدجمەنت ماماندىعىندا وقىدى.
«قازاقويل» جاق-ىنىڭ، «قازاقستان تەمىر جولى» رمك-ءىنىڭ اقپاراتتىق تەحنولوگيالار دەپارتامەنتتەرىن باسقاردى.
2002 جىلى مەملەكەتتىك قىزمەتكە كەلدى. قارجى، ەكونوميكا جانە بيۋدجەتتىك جوسپارلاۋ مينيسترلىكتەرىندە دەپارتامەنت ديرەكتورى قىزمەتىندە اقپاراتتاندىرۋ ماسەلەلەرىنە جەتەكشىلىك ەتتى.
2004 جىلعى 13 مامىردان باستاپ قازاقستان رەسپۋبليكاسى اقپاراتتاندىرۋ جانە بايلانىس اگەنتتىگى توراعاسىنىڭ ورىنباسارى بولىپ تاعايىندالدى.
2006 جىلى قازاقستان رەسپۋبليكاسى اقپاراتتاندىرۋ جانە بايلانىس اگەنتتىگى توراعاسى بولىپ تاعايىندالدى.
2010 جىلدان – «قازاقتەلەكوم» اق باسقارماسىنىڭ توراعاسى قىزمەتىن اتقاردى.
