وسكەمەن مەن سەمەي قالالارىنداعى شامداردى اۋىستىرۋ جۇمىستارى 94%-عا ورىندالسا دا، بەس جىلداي ۋاقىت وتكەن، جوبا اياقتالماعان. جاڭا لامپالار ىستەن شىعىپ، ءتىپتى ورتالىق كوشەلەردەگى فونارلار دا ءسونىپ، ايلار بويى جانباي تۇرادى. بۇل تۋرالى پارلامەنت ءماجىلىسىنىڭ دەپۋتاتى، «AMANAT» فراكتسياسىنىڭ مۇشەسى سامات نۇرتازا “ادىرنا” ۇلتتىق پورتالىنا بەرگەن سۇحباتىندا ايتىپ بەردى. دەپۋتات بۇل ءىستى ءوزى قولعا الماق.
– سىزگە دەپۋتات رەتىندە قانداي ماسەلەلەر كەلىپ تۇسەدى؟ سولار تۋرالى ايتىپ بەرىڭىزشى.
– مەنىڭ اتىما وسكەمەن مەن سەمەي قالالارىنىڭ تۇرعىندارىنان تۇنگى ۋاقىتتا قالا كوشەلەرىندەگى جارىقتىڭ ناشار ەكەندىگى تۋرالى شاعىمدار كەلىپ ءتۇستى.
– مۇنىڭ سەبەبى نەدە؟ تولىعىراق ايتىپ بەرە الاسىز با؟
– ءيا، ارينە. 2017 جىلى قازاقستاننىڭ «جاسىل ەكونوميكاعا» كوشۋى اياسىندا «شىعىس قازاقستان وبلىسى مەملەكەتتىك-جەكەمەنشىك ارىپتەستىگى وڭىرلىك ورتالىعى» اكتسيونەرلىك قوعامى مەن ەۋروپا قايتا قۇرۋ جانە دامۋ بانكى اراسىندا «وسكەمەن قالاسىندا جانە سەمەي قالاسىندا كوشەنى جارىقتاندىرۋ جۇيەسىن جاڭعىرتۋ» جوباسى بويىنشا قۇنى 4,8 ملرد تەڭگە بولاتىن كرەديتتىك شارت جاسالدى. ونىڭ ىشىندە ەۋروپا قايتا قۇرۋ جانە دامۋ بانكىنىڭ كرەديتى - 3,6 ملرد تەڭگە، ال جەرگىلىكتى بيۋدجەتتەن قارجىلاندىرۋ - 1,2 ملرد تەڭگە بولدى. 2019 جىلى تەندەر قورىتىندىسى بويىنشا ەۋروپا قايتا قۇرۋ جانە دامۋ بانكىنىڭ ساتىپ الۋ ەرەجەلەرىنە سايكەس مەردىگەر انىقتالىپ، ونىمەن «جوبالاۋ» – «جەتكىزۋ» – «ورناتۋ» – «قىزمەت كورسەتۋ» بويىنشا شارتقا قول قويىلدى.
– قاراجات تولىق كولەمدە ءبولىندى مە؟
– ارينە! قاراجات تولىق ءبولىنىپ، تولىعىمەن يگەرىلدى. سول كەزدە تۇرعىندارعا جوبا ىسكە اسقاننان كەيىن بۇل قالالار جەرگىلىكتى «لاس-ۆەگاسقا» نەمەسە «ماكاوعا» اينالادى، ال ءوڭىردىڭ وسى ەكى قالا بويىنشا جارىقتاندىرۋعا كەتەتىن شىعىندارى 60 %-عا قىسقارادى دەپ ۋادە بەرگەن.
شامداردى اۋىستىرۋ جۇمىستارى 94%-عا ورىندالسا دا، ءوزىن كوتەرەتىن، وقشاۋلانعان 335 كم كابىل تارتىلىپ، سىرتقى جارىقتى باسقاراتىن 394 شكاف ورناتىلسا دا، بەس جىلداي ۋاقىت ءوتتى، جوبا اياقتالعان جوق. جاڭا لامپالار ىستەن شىعىپ جاتىر، ءتىپتى ورتالىق كوشەلەردەگى فونارلار دا ءسونىپ، ايلار بويى جانباي تۇرادى.
– ال وبلىس اكىمدىگى نە دەيدى؟
– بىزگە وبلىس اكىمدىگىندە تۇسىندىرگەندەي، جوبانى ىسكە اسىرۋ كەزەڭىندە مەردىگەر ۇيىم تاراپىنان شامداردىڭ، قۇرىلىس-مونتاجداۋ جۇمىستارىنىڭ، قىزمەت كورسەتۋدىڭ ساپاسىنا قاتىستى پروبلەمالى ماسەلەلەر تۋىنداعان. اكىمدىك بىزگە، - قازىرگى ۋاقىتتا قالالاردا جارىقتى قالپىنا كەلتىرۋ جۇمىستارى وبلىس اكىمىنىڭ باقىلاۋىندا، - دەپ سەندىردى.
– دەپۋتات رەتىندە قانداي جوسپارىڭىز بار؟
– وسىعان بايلانىستى ءبىز بۇل جاعدايدى مۇقيات باقىلايتىن بولامىز. جاۋاپتىلار بيۋدجەتتەن بولىنگەن ءاربىر تەڭگە ءۇشىن جاۋاپ بەرۋگە ءتيىس. دەپۋتات رەتىندە مەن بۇعان بارىنشا كۇش سالامىن.
– سۇحباتتاسقانىڭىز ءۇشىن راحمەت!
“ادىرنا” ۇلتتىق پورتالى
