جاريالانعان ۆيدەودا ەسىك الدىندا جايىلىپ جۇرگەن ەسەكتەردى كورۋگە بولادى. ۆيدەودا سويلەگەن ەر ادامنىڭ سوزىنشە، ەسەكتى باعىپ جۇرگەن تۇرعىن مالدىڭ اياق-سيراعى مەن قارىن-ىشەگىن قاپقا سالىپ، شۇڭقىرعا تاستاعان.
“سىزدەرگە دالەل كەرەك بولسا مىنە. ەسەكتىڭ اياق-سيراقتارى ءبارى تۇر. شۇڭقىردىڭ ىشىندە قارىندارى جاتىر. ەسەكتەر ءجۇر، مال سويىلىپ جاتىر. قۇدايدان قورىقپايتىندار-اي”،- دەيدى اۆتور ۆيدەوسىندا.
وسىعان دەيىن، 17 مامىردا باق بەتتەرىندە شىمكەنت قالاسىنىڭ تۇرعىنى ەسەك ەتىن قىتايعا ەكسپورتتاماق بولعانى ايتىلعان.
دەرەكتەر بويىنشا بەينەجازبا شىمكەنتتەگى قۇرساي شاعىناۋدانىندا تۇسىرىلگەن.
"بۇنىڭ ءبارى نەگە ءجۇر؟ مىنە، ولارعا جۋىندى بەرەدى. تويحانادان با، ءبىر جاقتان الىپ كەلەدى-اۋ شاماسى. ونى سويعان، دالەل رەتىندە مىنا شۇڭقىردا ەسەكتىڭ سيراقتارى، ىشەك-قارنى جاتىر. اۋرۋ قايدان تارايدى؟ ارينە، وسى جەردەن... ۆەتەريناريالىق ينسپەكتسيا ماماندارىن، پوليتسيانى شاقىردىق",-دەيدى ۆيدەو اۆتورى.
ۆەتەريناريالىق باقىلاۋ جانە قاداعالاۋ كوميتەتىنىڭ قالالىق ينسپەكتسياسىنداعى وقيعانىڭ 12 مامىردا بولعانىن ايتادى.
كاسىپ يەسىنىڭ ماماندارعا بەرگەن جاۋابىنا سايكەس، ول بۇل جەردە 104 باس ەسەك پەن 36 ۇساق مال ۇستاعان.
«جۇرگىزىلگەن تەكسەرۋ جۇمىسىنا سايكەس كاسىپكەر 4 ەسەكتى بەلگىلەنبەگەن ورىندا سويعانى انىقتالدى. ال ونىڭ ەتىن توڭازىتقىشتا ساقتاعان. بىزگە بەرگەن جاۋابىندا ول مال ەتىن جيناپ، قىتاي ەلىنە ەكسپورتتاماق بولعانىن ايتتى. سويىلعان ەتتىڭ بارلىعىن ءبىز الدىق، ونى جويۋ جۇمىستارى ءجۇرىپ جاتىر. ءبىزدىڭ زاڭنامادا ەسەك اسىراۋعا تىيىم سالىنباعان. بىراق ونى ارنايى بەكىتىلگەن ورىندا سويۋ كەرەك. بۇل تالاپتى ورىنداماعانى ءۇشىن (اكىمشىلىك قۇقىق بۇزۋ تۋرالى كودەكستىڭ 406-بابى) كاسىپ يەسىنە ايىپپۇل سالىندى»،-دەدى شىمكەنت قالالىق ۆەتەريناريالىق باقىلاۋ ينسپەكتسياسىنىڭ ءبولىم باسشىسى سىرىم قارابەكوۆ.
