جەزقازعاندا رۋلىندە 5 جاسار بالا وتىرعان كولىك تۇرعىنداردى قاعىپ كەتتى. وقيعا سالدارىنان بەس ادام زارداپ شەكتى. بۇل تۋرالى الەۋمەتتىك جەلىدە ۆيدەو پايدا بولدى، دەپ حابارلايدى “ادىرنا” ۇلتتىق پورتالى.
كادرلارعا قاراعاندا، وقيعا قالاداعى ويىن-ساۋىق ورىندارىنىڭ ءبىرىنىڭ الدىندا بولعان. كولىك مەيرامحانانىڭ الدىنداعى الاڭدا ءسال ەڭىسكە قويىلعان. كادرلاردا ونىڭ ارتقا قاراي اۋناپ، مەيرامحانادان شىعىپ كەتكەن ادامدار توبىنا سوعىلعانىن كورۋگە بولادى.
وقيعادان بىرنەشە سەكۋندتان كەيىن كولىكتەن جۇگىرىپ شىققان بالا دا كادرعا ءتۇسىپ قالعان.
بەينەجازباعا قاراعاندا، بالا كولىكتى باسقارىپ وتىرعان. بىرنەشە سەكۋندتان كەيىن كولىكتەن ءبىر ايەل ءتۇسىپ، الدىمەن زارداپ شەككەندەردى اينالىپ، سودان كەيىن كومەككە جۇگىرگەن ەر ادامدارعا قاراي بەت الادى.
بەينەجازباعا ۇلىتاۋ وبلىستىق پوليتسيا دەپارتامەنتىنىڭ ءباسپاسوز قىزمەتى تۇسىنىكتەمە بەردى. ۆەدومستۆو اپاتتىڭ جەزقازعان قالاسىندا بولعانىن راستاپ، ونىڭ ەگجەي-تەگجەيلەرىن جەتكىزدى.
«جكو فاكتىسى پوليتسيادا تىركەلدى، زارداپ شەككەندەر جوق، ناتيجەسىندە كولىكتە وتىرعان بەس جاسار بالانىڭ قول تەجەگىشتى شەشىپ العانى انىقتالدى. جاياۋ جۇرگىنشىلەر ءتۇرلى دەنە جاراقاتتارىمەن اۋرۋحاناعا جاتقىزىلدى»، - دەپ حابارلادى ءباسپاسوز قىزمەتىنەن.
ۇلىتاۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى زارداپ شەككەندەردىڭ جاعدايىن ايتتى.
ۆەدومستۆونىڭ مالىمەتىنشە، اۋرۋحاناعا تۇسكەن ءتورت ادامنىڭ بىرەۋى عانا ەر ادام. قابىرعالارى سىنعان، ىشكى اعزالارى كوگەرگەن. زارداپ شەككەن ءۇش ايەل امبۋلاتورلىق ەمدەلۋگە جىبەرىلدى، ولاردىڭ دا ىشكى اعزالارى كوگەرگەن.
