رەسەي پرەزيدەنتى ۆلاديمير ءپۋتيننىڭ وزبەكستانعا جاساعان مەملەكەتتىك ساپارى اياسىندا 27 قۇجاتقا قول قويىلدى. بۇل تۋرالى Kazinform اگەنتتىگىنىڭ تاشكەنتتەگى مەنشىكتى ءتىلشىسى جاريالادى، دەپ حابارلايدى “ادىرنا” ۇلتتىق پورتالى.
وزبەكستان باسشىسىنىڭ ءباسپاسوز قىزمەتىنەن مالىمدەگەندەي، ەكى ەل باسشىلارى اۋەلى شاعىن قۇرامدا كەزدەسىپ، كۇن تارتىبىندەگى ماسەلەلەردى تالقىلادى. ونىڭ بارىسىندا مەملەكەتتەر اراسىنداعى جوعارى ساۋدا-ەكونوميكالىق ىنتىماقتاستىق جايى ءسوز بولدى.
اتاپ ايتقاندا، وزبەكستاندا رەسەيلىك ينۆەستيتسيانىڭ كولەمى ارتىپ، ونەركاسىپتىك كووپەراتسيا دامىپ كەلەدى. ونىڭ ناتيجەسىندە بىرلەسكەن جوبالار پورتفەلى 45 ملرد دوللارعا جەتتى. وسى ورايدا رەسەي مەن وزبەكستان پرەزيدەنتتەرى جەتەكشى كاسىپورىنداردىڭ جوبالارىن قولداۋ ءۇشىن بىرلەسكەن ينۆەستيتسيالىق پلاتفورمانى ىسكە قوسۋعا ۋاعدالاستى.
سونىمەن قاتار، ۆلاديمير پۋتين مەن شاۆكات ميرزيوەۆ شاعىن قۇرامداعى كەزدەسۋدە ءبىلىم بەرۋ جانە ينجەنەرلىك باعىتتاعى كادرلاردى دايارلاۋ ىسىنە ەرەكشە توقتالدى.
ساپار اياسىندا وزبەكستاندا باۋمان اتىنداعى ماسكەۋ تەحنيكالىق ۋنيۆەرسيتەتىنىڭ جانە بۇكىلرەسەيلىك سىرتقى ساۋدا اكادەمياسىنىڭ فيليالدارىن اشۋ تۋرالى كەلىسىمدەرگە قول قويىلدى. كەيىن كەلىسسوزدەر كەڭەيتىلگەن قۇرامدا ءوتتى. وندا تاراپتار پارلامەنت، ۇكىمەت، مينيسترلىكتەر مەن جاۋاپتى ۆەدومستۆولار دەڭگەيىندە قارقىندى بايلانىستاردى جالعاستىرۋعا ۋاعدالاستى.
«ءسىزدىڭ مەملەكەتتىك ساپارىڭىزدى تاريحي ماڭىزعا يە دەپ ايتۋعا بولادى. بۇل ءبىزدىڭ ەلدەرىمىز اراسىنداعى جان-جاقتى ستراتەگيالىق ارىپتەستىك پەن وداقتاستىق قاتىناستاردىڭ جاڭا كەزەڭى باستالعانىن ايعاقتايدى»، - دەدى شاۆكات ميرزيوەۆ.
ودان بولەك، قوس ەلدىڭ باسشىلارى ءوزارا تاۋار اينالىمىنىڭ كەيىنگى 7 جىلدا 2,5 ەسە وسكەنىن اتاپ ءوتتى. تاراپتار الداعى ۋاقىتتا ونىڭ كولەمىن 30 ملرد دوللارعا دەيىن ارتتىرۋعا نيەتتى.
جوعارى دەڭگەيدە تالقىلانعان سالالاردىڭ ءبىرى – ەنەرگەتيكا. وزبەكستان مەن رەسەي گاز تاسىمالداۋ جۇيەسىن جاڭعىرتۋ، كوگىلدىر وتىن مەن مۇناي ونىمدەرىن جەتكىزۋ كولەمىن ۇلعايتۋ جونىندەگى جوبالاردى قولعا الۋعا كەلىستى. بۇعان قوسا، ساپار بارىسىندا رەسەيدىڭ قاتىسۋىمەن وزبەكستاندا از قۋاتتى اتوم ەلەكتر ستانتسياسىن سالۋ بويىنشا كەلىسىمگە قول قويىلماق.
جوعارىدا اتالعاندارمەن قاتار، مەترولوگيا سالاسىندا وزبەكستانعا تەحنيكالىق كومەك كورسەتۋ، بىرلەسكەن كينو ءوندىرىسى، حالىقتىڭ سانيتاريالىق-ەپيدەميولوگيالىق سالاۋاتتىلىعىن قامتاماسىز ەتۋ سالاسىنداعى ىنتىماقتاستىق كەلىسىمدەرىنە قول قويىلدى. كەلىسسوز قورىتىندىسى بويىنشا ۆلاديمير پۋتين مەن شاۆكات ميرزيوەۆ ءوز ۇكىمەتتەرىنە كەلىسىلگەن ءار باعىت بويىنشا «جول كارتاسىن» قابىلداۋدى تاپسىردى.
ەسكە سالايىق، كەشە رەسەي پرەزيدەنتى ۆلاديمير پۋتين مەملەكەتتىك ساپارمەن وزبەكستانعا كەلگەن. ونى اۋەجايدان شاۆكات ميرزيوەۆ كۇتىپ الدى.
