الماتىدا 26 مامىردا قازاق تاعامتانۋ اكادەمياسىنىڭ پرەزيدەنتى، ەڭبەك ەرى، اكادەميك تورەگەلدى شارمانوۆتى اقتىق ساپارعا شىعارىپ سالدى. اكادەميك اقساقال 25 مامىردا قايتىس بولعان ەدى. مارقۇممەن قوشتاسۋ ءراسىمى الماتى قالاسىندا س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە ءوتتى. ول فەيسبۋك جەلىسىندەگى سوڭعى جازباسىندا ءومىردىڭ وتكىنشى ەكەنىن ەسكە الىپ، ادامزات بالاسىنىڭ ماڭگىلىك ساپار ۇستىندە ەكەنىن ايتادى.
94 جاسقا قاراعان شاعىندا باقيعا كوشكەن تورەگەلدى اقساقال الەۋمەتتىك جەلىدە دە بەلسەندى بولاتىن. ونىڭ، اسىرەسە، كوروناۆيرۋس پاندەمياسى كەزىندە جەلى ارقىلى ايتقان اقىل-كەڭەستەرىن كوپشىلىك ۇمىتپاعان بولار. كەيىن دە ءوزىنىڭ تۇيگەن وي-پايىمدارىن ورتاعا سالىپ جۇرەتىن. فەيسبۋك بەتىندەگى پاراقشاسىندا اقساقالدىڭ سوڭعى جازباسى 28 اقپاندا تىركەلىپتى. سول جازبانى وقىپ وتىرىپ قايران قالاسىڭ. اقساقال ءومىر تۋرالى تولعانىپ، باقيدى ەسكە الادى. «ادام بالاسىنىڭ وزىنە بەلگىلەنگەن ۋاقىت – ءومىرى» جايىندا، «اسپانداعى كوپ جۇلدىزعا اينالۋى» تۋرالى ايتادى. سوڭىندا ماڭگىلىك ساپارمەن تۇيىندەيدى. وسى بىرەر اۋىز جازباسىنىڭ وزىندە ءومىردىڭ ءمانىن بەينەلەپ بەرە سالعانداي اسەر قالدىرادى. تومەندە سول جازبانى ۇسىنىپ وتىرمىز.
ءار ادامنىڭ ءومىرى ءبىر سالىنعان سامال اۋەندەي، ايتىلعان ادۋىن جىرداي، كۇمبىرلەگەن كۇمىس كۇيدەي، سىزدىقتاپ باستالىپ، تولقىنداي يىرىمدەنىپ، بۋىرقانىپ، قىران قۇستاي قالىقتاپ، اشىق اسپان استىندا كۇن مەن ايدىڭ نۇرىنا شومىلىپ، الەمگە ءۇنىن ەستىرتىپ، ءتاڭىردىڭ پەشەنەگە جازۋىمەن تايتالاس-تارتىس جەتەگىندە جۇرگەندە سىناپتاي سىرعىپ وتەتىن، ەشكىمنىڭ ۋىسىندا ماڭگى قالمايتىن، ءار كوڭىلدە ارمان بولىپ ۇيالاپ، باقيعا اتتاناتىن ءبىر تىلسىم دۇنيە. ادام اتا مەن حاۋا انا زامانىنان بەرى قانشاما ءداۋىر دۇبىرلەپ وتكەنىمەن، ادام جانىنىڭ قۇپياسى جۇمباق كۇيىندە قالا بەرمەك.
ادام بالاسى وزىنە بەلگىلەنگەن ۋاقىت - ءومىرىن ءسۇرىپ، ونەرىن كورسەتىپ، قايتادان اسپانداعى كوپ جۇلدىزعا اينالاتىنداي، اينالمالى تىلسىم دۇنيەدەگى ءبىر قوناق ءتارىزدى. ەشبىر جانعا ومىرگە كەلۋىنىڭ سىرى جايلى تۇسىنىك بەرىلمەگەن، بويىنا بىتكەن كۇش-قۋاتى، جىگەر-دارىنى، قانى مەن قاسيەتىنە ساي جەر بەتىندەگى وزىنە دايىندالعان ءرولىن سومداپ، تەك وزىنە ارنالعان سىي-سىياپاتىن، قۋانىش-باقىتىن يەمدەنىپ، تاۋقىمەتى مەن قيامەتىن ارقالاپ، توقتاۋدى بىلمەيتىن ۋاقىت ديىرمەنىنە ءتۇسىپ كەتە باراتىن جالپى ادامزات بالاسىنىڭ عۇمىرى ماڭگىلىك ساپار ۇستىندە دەسە بولار.
Toregeldy Sharmanov
