شىمكەنت قالاسىنىڭ مامانداندىرىلعان اۋدانارالىق قىلمىستىق سوتى بۇرىنعى شىمكەنت اكىمىنىڭ ورىنباسارى ماقسۇت يساحوۆتى 8,5 جىلعا سوتتادى، دەپ حابارلايدى “ادىرنا” ۇلتتىق پورتالى.
ماقسۇت يساحوۆ ءومىرىنىڭ سوڭىنا دەيىن مەملەكەتتىك قىزمەت اتقارۋ قۇقىعىنان ايىرىلدى.
ماقسۇت يساحوۆ 2020 جىلدىڭ اقپان ايىنان باستاپ شىمكەنت اكىمى ورىنباسارى قىزمەتىن اتقاردى، بىرنەشە سالالارعا جەتەكشىلىك ەتتى. كولىك جانە اۆتوجولدار سالۋ، تۋريزم، قالانىڭ سپورتتىق ءومىرى، تسيفرلاندىرۋ جانە جەردى پايدالانۋ مەن قورعاۋدى مەملەكەتتىك باقىلاۋ سالالارىنا جاۋاپتى بولعان.
2023 جىلعى 20 شىلدەدە ۇقك قىزمەتكەرلەرى ماحسۋت يساحوۆتى سىبايلاس جەمقورلىققا كۇدىك بويىنشا ۇستادى. وعان شىمكەنت قالاسى بويىنشا ۇقكد ءبىرىنشى ورىنباسارى مانات سارباسوۆقا اسا ءىرى مولشەردە پارا بەرۋگە وقتالعانى ءۇشىن ايىپ تاعىلدى.
تەرگەۋ مالىمەتتەرى بويىنشا، يساحوۆ مانات سارباسوۆقا قارسى قىلمىستىق ءىستى توقتاتقانى ءۇشىن 200 مىڭ دوللار ۇسىنعان. يساحوۆ ۇقكد باستىعىنىڭ ورىنباسارى ودان جارتى ميلليون دوللار بوپسالاعانىن مالىمدەدى.
مەملەكەتتىك ايىپتاۋشى سوتتالۋشىعا مەملەكەتتىك قىزمەتتە قىزمەت ەتۋ قۇقىعىنان ءومىر بويىنا ايىرا وتىرىپ، 8,5 جىلعا باس بوستاندىعىنان ايىرۋدى سۇرادى، سونداي-اق يساحوۆتى «قۇرمەت» مەملەكەتتىك وردەنىنەن ايىرۋدى ۇسىندى.
ءوزىنىڭ سوڭعى سوزىندە ماقسۇت يساحوۆ 3,5 جىل اكىمدىكتەگى قىزمەتىندە ءادىل، ابىرويمەن جۇمىس ىستەۋگە تىرىسقانىن ايتتى.
«قولىمنان كەلگەنىن بارلىعىن جاسادىم. شىمكەنت قالاسى حالقىنىڭ جاقسى ءومىر سۇرۋىنە جاعداي جاساۋعا تىرىستىم. مانات سارباسوۆتىڭ ماعان دەگەن جەكە كوزقاراسى بولعانىن بىلەمىن. پروكۋرورلار 8,5 جىل سۇرادى. بۇل وقيعادان ماعان سەنەتىن ادامدار بار ەكەنىنە كوزىم جەتتى. سوت ءادىل شەشىم شىعارادى دەپ ويلايمىن. بىزدەگى زاڭ ءادىل دەپ ويلايمىن»، - دەدى ول.
شىمكەنت قالاسىنىڭ اۋدانارالىق سوت اكىمنىڭ ەكس-ورىنباسارىن 8,5 جىلعا سوتتادى. ۇكىم زاڭدى كۇشىنە ەنگەن جوق.
