پاۆلودار وبلىسىندا وڭتۇستىك ايماقتاردان سولتۇستىكتەگى حالقى از ەلدى مەكەندەرگە قونىستاندىرۋعا بولىنگەن بيۋدجەتتىك قاراجات ۇرلانعان، دەپ حابارلايدى "ادىرنا" ۇلتتىق پورتالى.
وبلىستا حالىق كوشىپ كەتكەندىكتەن 59 ەلدى مەكەن جويىلعانى انىقتالدى.
ءىس جۇزىندە قاراۋسىز قالعان ۇيلەر 500 مىڭ تەڭگەدەن باستاپ ساتىپ الىنعان. «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسىن ىسكە اسىرۋ اياسىندا بيۋدجەت قاراجاتىن يەمدەنۋدىڭ تۇتاس سحەماسى جاسالعان.
ال جوبا اياسىندا ءۇي ساتىپ الۋ ءۇشىن باعاسىنىڭ 50%-ى وتەلەدى، بىراق بەرىلەتىن قارجى 4,2 ميلليون تەڭگەدەن اسپاۋى كەرەك ەكەندىگى كورسەتىلگەن. شىعىننىڭ جارتىسىن الۋ ءۇشىن ۇيلەردىڭ قۇنىن 8 ميلليون تەڭگەگە دەيىن جاساندى تۇردە كوتەرگەن.
باعدارلاما اياسىندا قونىس اۋدارۋ تەك قاعاز جۇزىندە عانا ورىندالعان. وبلىسقا بولىنگەن 3 جارىم ملرد تەڭگەنىڭ 600 ملن. تەڭگەسى جىمقىرىلعانى انىقتالعان.
پروكۋراتۋرا تەكسەرۋ ماتەريالدارىن قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگى بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە تىركەدى، تەرگەۋ امالدارىن ارنايى پروكۋرور جۇرگىزۋدە.
"تەكسەرۋ جالعاسۋدا", - دەلىنگەن پاۆلودار وبلىسىنىڭ پروكۋراتۋراسىنىڭ حابارلاماسىندا.
