بۇگىن - قازاقستان تاريحىنداعى العاشقى ايەل ەلشى اقمارال ارىستانبەكوۆانىڭ تۋعان كۇنى، دەپ حابارلايدى "ادىرنا" ۇلتتىق پورتالى.
ول - قازاقستان رەسپۋبليكاسىنىڭ بىرىككەن ۇلتتار ۇيىمىنداعى ءبىرىنشى تۇراقتى وكىلى، قر سىرتقى ءىستەر مينيسترلىگىنىڭ ەرەكشە تاپسىرمالار بويىنشا ەلشىسى قىزمەتىن اتقارعان.
قازاقتان شىققان تۇڭعىش ايەل ەلشى 1948 جىلدىڭ 12 مامىرىندا الماتى قالاسىندا دۇنيەگە كەلگەن.
اقمارال قايدارقىزىنىڭ ەڭبەك جولى 1974 جىلى قازاق مەملەكەتتىك ۋنيۆەرسيتەتىندەگى زەرتحانادا كىشى، اعا عىلىمي قىزمەتكەر بولىپ باستاپ، 1978-1981 جىلدارى قازاقستان لەنيندىك كوممۋنيستىك جاستار وداعى ورتالىق كوميتەتىنىڭ عىلىممەن اينالىساتىن جاستارمەن جۇمىس ءبولىمىنىڭ مەڭگەرۋشىسى بولادى. ودان كەيىن 1981-1983 جىلدارى قازاقستان لەنيندىك كوممۋنيستىك جاستار وداعى ورتالىق كوميتەتىنىڭ حاتشىسى بولدى.
ال 1983 جىلى اقمارال ارىستانبەكوۆا قازاق دوستىق جانە مادەنيەت قوعامداستىعىنىڭ شەت مەملەكەتتەرمەن بايلانىس بويىنشا پرەزيديۋم ءتوراعاسىنىڭ ورىنباسارى، 1984 جىلى پرەزيديۋم توراعاسى بولعان. 5 جىلدان سوڭ قازاق كسر سىرتقى ىستەر ءمينيسترى لاۋازىمىنا تاعايىندالادى.
1991 جىلدىڭ جەلتوقسانىنان 1992 جىلدىڭ ساۋىرىنە دەيىن ا.ارىستانبەكوۆا بىرىككەن ۇلتتار ۇيىمى جانىنداعى رەسەي فەدەراتسياسى ۇكىمەتىنىڭ اعا كەڭەسشىسى – قازاقستان رەسپۋبليكاسىنىڭ وكىلى بولادى. تاۋەلسىزدىك العاننان كەيىن 1992 جىلدىڭ 15 ساۋىرىندە قر ءبىرىنشى پرەزيدەنتى نۇرسۇلتان نازارباەۆ ارىستانبەكوۆانى بۇۇ جانىنداعى قازاقستان رەسپۋبليكاسىنىڭ تۇراقتى وكىلى رەتىندە تاعايىندايدى. بۇل لاۋازىمدى اقمارال ارىستانبەكوۆا 1999 جىلعا دەيىن اتقارادى.
1996 جىلدان باستاپ اقمارال ارىستانبەكوۆا توتەنشە جانە وكىلەتتى ەلشى لاۋازىمىنداعى قىزمەت جولى جالعاسىن تابادى. كەيىننەن سول جىلدىڭ قازانىنان باستاپ، قازاقستان كۋبا رەسپۋبليكاسىنداعى ءتوتەنشە جانە وكىلەتتى ەلشىسى بولادى. ال 1999 جىلدان 2003 جىلعا دەيىن قازاقستان رەسپۋبليكاسىنىڭ فرانتسيا رەسپۋبليكاسىنداعى توتەنشە جانە وكىلەتتى ەلشىسى بولىپ، سونداي-اق قازاقستان رەسپۋبليكاسىنىڭ يۋنەسكو-داعى تۇراقتى وكىلى لاۋازىمىن قاتار اتقارادى.
بۇگىندە قازاق تاريحىندا ەسىمى التىن ارىپتەرمەن جازىلعان ۇلى ايەل 76 جاسقا تولىپ وتىر.
