مەملەكەت باسشىسى قاسىم-جومارت توقاەۆ الماتىدا وتەتىن ازەربايجان مەن ارمەنيا اراسىنداعى كەلىسسوز تۋرالى ايتتى، دەپ حابارلايدى “ادىرنا” ۇلتتىق پورتالى.
پرەزيدەنت ازەربايجان مەن ارمەنيا اراسىنداعى كەلىسسوزدىڭ الماتىدا وتۋىندە سيمۆولدىق ءمان بارىن تىلگە تيەك ەتتى:
“قازاقستان تاراپىنىڭ ۇسىنىسى بويىنشا ازەربايجان مەن ارمەنيا اراسىنداعى بەيبىت كەلىسىمگە دايىندىق جۇرگىزۋ ماقساتىندا ەكى ەلدىڭ سىرتقى ىستەر مينيسترلەرىنىڭ كەلىسسوزىن وتكىزۋ تۋرالى ءوزارا كەلىسىمگە كەلگەنىن قۇپتايمىن. بۇل ماڭىزدى شارانىڭ الماتىدا ۇيىمداستىرىلۋىنىڭ سيمۆولدىق ءمانى بار. ويتكەنى 1991 جىلى جەلتوقسان ايىندا تمد ەلدەرىنىڭ تاۋەلسىز دامۋىنا نەگىز قالاعان جانە مەملەكەتارالىق شەكارانى انىقتاۋ قاعيدالارىن بەكىتكەن تاريحي قۇجاتقا – الماتى دەكلاراتسياسىنا قول قويىلعان ەدى”، – دەدى توقاەۆ.
توقاەۆتىڭ ايتۋىنشا، ەكى ەل اراسىنداعى كەزدەسۋ ازەربايجان-ارميان ۋاعدالاستىعىنىڭ ناقتى جۇزەگە اسۋىنا جول اشادى. جۋىق ارادا وڭتۇستىك كاۆكازدا تۇراقتى ءارى ۇزاقمەرزىمدى بەيبىتشىلىكتىڭ ورناۋىنا ىقپال ەتەدى دەيدى.
ەسكە سالا كەتەيىك، بۇعان دەيىن ازەربايجان مەن ارمەنيانىڭ سىرتقى ىستەر مينيسترلەرى بەيبىت كەلىسىم بويىنشا كەلىسسوزدەردى جالعاستىرۋ ءۇشىن الماتىدا كەزدەسەتىنى تۋرالى جازعان ەدىك.
