ەل مەكتەپتەرىندە 25 مامىر كۇنى سوڭعى قوڭىراۋ سوعىلاتىن بولدى، دەپ حابارلايدى "ادىرنا" ۇلتتىق پورتالى.
وقۋ-اعارتۋ ءمينيسترى عاني بەيسەمباەۆ مەكتەپ تۇلەكتەرىنە ۇندەۋ جاسادى.
"بيىلعى وقۋ جىلى 25 مامىردا اياقتالاتىندىعىن قاتاڭ ەسكەرتەمىن. وسىعان وراي، وقۋ باعدارلامالارىن جىل بويىنا تابىستى مەڭگەرگەن 3,8 ميلليوننان استام ەلىمىزدىڭ وقۋشىلارى، كەلەسى سىنىپتارعا كوشىرىلسىن. مەكتەپتىڭ 1-10 سىنىپ وقۋشىلارىنا ء"بىلىمىم وتانىما" تاقىرىبىنداعى بىرىڭعاي سىنىپ ساعاتتارىن وتكىزۋ 24 مامىر جۇما كۇنىنە جوسپارلانسىن. بۇل بىلتىرعى جىلدىڭ قىركۇيەك ايىندا ەنگىزىلگەن ء"بىرتۇتاس تاربيە باعدارلاماسى" شەڭبەرىندە قابىلدانعان جوسپارعا سايكەس ۇيىمداستىرىلۋى ءتيىس. ارىپتەستەرىمىزدىڭ ۇسىنىسى بويىنشا ەلىمىزدە مامىر ايىندا - "ىنتىماق ايى" ايلىعىن وتكىزۋ جوسپارلانعان. ونىڭ اياسىندا "تازا قازاقستان", "يگى ىستەر", "كانيكۋلدا كىتاپ وقيىق" جانە ت.ب. شارالار قاراستىرىلعان", - دەيدى مينيستر. سونىمەن قاتار، عاني بەيسەمباەۆ ەلىمىزدەگى 186 مىڭ مەكتەپ بىتىرۋشىلەرى ءۇشىن وقۋ جىلىنىڭ اياقتالۋىنا ارنالعان "سوڭعى قوڭىراۋ" ءىس-شاراسىن 25 مامىردا وتكىزۋدى تاپسىردى. "بيىلعى تۇلەكتەر اتالعان ءىس شارانى جوعارى مادەنيەتتىلىكپەن، ىسىراپشىلدىقسىز، داڭعازالىقسىز، رۋحاني-ادامگەرشىلىك دەڭگەيىندە وتكىزەتىندىكتەرىنە سەنىمدىمىن. بۇل بولاشاق تۇلەكتەر ءۇشىن ونەگەلى داستۇرگە اينالعان جاڭا فورماتتاعى جوعارى مادەنيەتتى العاشقى شارا بولارى ءسوزسىز. وقۋ جىلىن اياقتاۋدى ساپالى ۇيىمداستىرۋ جانە قاۋىپسىزدىك شارالارىن ساقتاۋ بويىنشا وڭىرلىك ءبىلىم باسقارامالارىنىڭ باسشىلارىنا دەربەس جاۋاپكەرشىلىك جۇكتەيمىن", - دەيدى مينيستر.
