تايلاندتا ەكى قازاقستاندىق قىز قۇلدىقتان قۇتقارىلدى. بۇل تۋرالى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى "ادىرنا" ۇلتتىق پورتالى.
استانادا وتكەن بريفينگتە ول ءىستىڭ ءمان-جايىن باياندادى. انىقتالعانداي، قىزدار جاسىرىن بايلانىس ورتالىعىنداعى بوس جۇمىس ورنىنا الدانىپ قالعان. ولار بىرنەشە ءتىل بىلەتىندىكتەن جۇمىسقا الماق بولعان-مىس. بىراق بارعاندا قىزداردى قۇلدىققا سالعان. 10 مىڭ دوللارداي قاراجات تالاپ ەتكەن.
«وسى جىلى قاڭتاردىڭ سوڭىندا تايلاندتاعى كونسۋلدىقتىڭ WhatsApp نومىرىنە حابارلاما كەلدى. وندا "مەن قازاقستان ازاماتىمىن. قاي مەملەكەت ەكەنىن بىلمەيمىن، دجۋنگليدىڭ ىشىندە قۇلدىققا ءتۇسىپ قالدىم، كومەكتەسىڭىزدەر" دەپ جازىلعان. دەرەۋ انىقتاي باستادىق. سويتسەك ءبىزدىڭ ەكى ازاكماتشامىز قۇلدىققا ءتۇسىپ قالعان. ەڭ قىزىعى ەكەۋىنىڭ دە جوعارى ءبىلىمى بار، بىرنەشە ءتىل بىلەدى. ينتەرنەتتەن حابارلامانى كورىپ، الدانىپ قالعان. ءار ادام باسىنا 10 مىڭ دوللاردان اقشا سۇراعان. جەرگىلىكتى بيلىكپەن جۇمىس ىستەپ، ءبىر ايدا ەكى ازاماتشا قۇتقارىلدى. قازىرگى تاڭدا ولار ەلگە كەلە جاتىر", - دەيدى ءسىم وكىلى ايبەك سمادياروۆ.
ايتۋىنشا، قىزداردى قۇلدىقتا ۇستاعاندارعا بىردە-ءبىر تەڭگە بەرىلمەي قۇتقارىلعان.
