جاڭا پرەمەردىڭ كانديداتۋراسىنا ءماجىلىس ءبىر اۋىزدان داۋىس بەرمەدى. قارسى بولماسا دا قالىس قالعاندار بار. دەپۋتاتتار ون ءۇشىنشى ۇكىمەتتى باسقارۋعا كەلگەن جاڭا پرەمەرگە نە ءۇشىن داۋىس بەرگەنىن ءتۇسىندىردى.
بۇگىن Amanat پارتياسى پرەزيدەنتكە ۇسىنىپ، ءماجىلىس دەپۋتاتتارىنىڭ ماقۇلداۋىمەن 44 جاستاعى ولجاس بەكتەنوۆ ۇكىمەت باسشىسى بولىپ تاعايىندالدى. بىراق پارلامەنتتى قازاقستان حالىق پارتياسى مەن جالپىۇلتتىق سوتسيال-دەموكراتيالىق پارتياسى وعان داۋىس بەرمەي قالىس قالاتىنىن مالىمدەدى. 69 دەپۋتات بەكتەنوۆتىڭ كانديداتۋراسىن قولداپ، 7 دەپۋتات قالىس قالدى.
جيىن سوڭىنان دەپۋتاتتاردىڭ پىكىرىن بىلدىك.
بەكتەنوۆتىڭ مىنەزىن ۇناتقان دەپۋتات
ءماجىلىس دەپۋتاتى, «اق جول» پارتياسىنىڭ توراعاسى ازات پەرۋاشەۆ ولجاس بەكتەنوۆتىڭ كانديداتۋراسىن 5 ءتۇرلى سەبەپكە بايلانىستى قولعانىن مالىمدەدى.
– ءبىزءدىڭ بۇل شەشىمدى قولداعانىمىزدىڭ بەس ناقتى سەبەءبى بولدى. بىرىنشىدەن, بۇل شەشىم پارلامەنتتىڭ داستۇرىنە ساي كەلەتىن ۇسىنىس. ياعني, پارلامەنت كوپشىلىك داۋىسپەن پرەمەر-ءمينيستردى تاعايىنداۋعا شەشىم قابىلداۋى مۇمكىن. ەكىنشىدەن، بەكتەنوۆ مىرزا كوپ جىلدار بويى ەكونوميكا سالاسىندا قىزمەت ەتكەن. جەمقورلىقتان زارداپ شەگەتىن ەڭ الدىمەن كىمدەر؟ ول – ارينە كاسىپكەرلەر, وندىرىسشىلەر. پرەزيدەنت اكىمشىلىگىنە باسشىلىققا كەلمەي تۇرعاندا ياعني, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىن باسقارعان كەزدە بىرنەشە رەت دەپۋتاتتىق ساۋال جولدادىق. ءوزى حابارلاسىپ، شاقىرىپ ماسەلەنى تالقىلاپ، سول ارقىلى ناقتى شەشىمگە كەلگەن بولاتىنبىز. ءتىپتى كەيبىر كەزدەرى ءتيىستى قىزمەتكەرلەرى جاۋاپكەرشىلىككە تارتقان بولاتىنبىز. ءۇشىنشىدەن، بەكتەنوۆتىڭ ەرەكشەلىگى مىنەزىندە دەپ ايتار ەدىم. ول كوپ سويلەمەيدى، سابىرلى, بىراق مىنەزى قاتاڭ جانە ءوز سوزىنەن تايمايدى. ياعني, ايتقان شەشىمدى اياعىنا دەيىن جەتكىزە الادى, - دەدى ول.
سول دەپۋتات. سمايىلوۆ تۋرالى
ولجاس بەكتەنوۆتى جەر كوككە سىيدىرماي ماقتاعان ازات پەرۋاشەۆ بۇرىنعى پرەمەر ءاليحان سمايلوۆتىڭ جۇمىسىن ىسكە العىسىز ەتىپ تاستادى.
– بىرىنشىدەن, سمايىلوۆ پرەزيدەنتتىڭ قىركۇيەك ايىندا جولداعان ەكونوميكالىق وزگەرىستەرىنە قاتىستى تاپسىرمالارىن ىسكە اسىرعان جوق. ەكىنشىدەن, سمايىلوۆتىڭ ۇكىمەتىندە ءاپ-ادەمى جوبالاردىڭ تۇساۋكەسەرىن وتكىزىپ، جاقسى بايانداما جاساۋدى ۇيرەنىپ الدى. بىراق سايلاۋشىلارمەن كەزدەسۋگە ايماققا بارعاندا سول سوزدەر ءسوز كۇيىندە قالعانىن كوردىك. قازىرگى ماقساتىمىز مەملەكەتتىك دەڭگەيدە قابىلداعان شەشىمدەردى ىسكە اسىرۋ بولىپ وتىر, – دەدى ول.
«ەسەپ بەرەتىن ۇكىمەتتى كۇتەمىن»
ءماجىلىس دەپۋتاتى جۇلدىز سۇلەيمەنوۆانىڭ پىكىرى دە ازات تۇرلىبەكۇلىنىڭ سوزىنە ۇقساس. ياعني, ول ەسكى ۇكىمەتكە وكپەسى بار ەكەنىن جاسىرمادى. سونداي-اق دەپۋتات «پرەمەر-مينيستر گۋمانيتار ەمەس، نەگە ءوندىرىس سالاسىنىڭ وكىلى بولمادى؟» دەپ سۇراق قويدى.
– نەگىزى حالىقتىڭ اراسىندا وسىنداي پىكىر بولعانى راس. بىراق دەگەنمەن مەنىڭ ويىمشا, ءدال قازىرگى تاڭدا زاڭنىڭ ۇستەمدىگى، ءتارتىپ قاعيداتىن ورنىقتىرۋ ءۇشىن جانە الەۋمەتتىك باعدارلامالارعا كەتىپ جاتقان قاراجاتتى دەر كەزىندە اياعىنا دەيىن جەتكىزۋ ءۇشىن جەمقورلىقتان تازا ادامنىڭ كەلگەنى قاجەت. ەكىنشىدەن, جاڭا ءۇكىمەتتەن ەسەپ بەرەتىن ۇكىمەت فورمۋلاسىنىڭ ورىندالعانىن كۇتەمىن. ويتكەنى وزدەرىڭىز بىلەسىزدەر، بۇعان دەيىن اقپاراتقا قولجەتىمدىلىك تۋرالى زاڭنىڭ اياسىندا ەسكى ۇكىمەت بىرقاتار تۇزەتۋلەر ەنگىزگەن. ناقتىراق ايتسام, ەسكى ۇكىمەت دەپۋتاتتىق قىزمەت پەن پارلامەنتكە بايلانىستى شەكتەۋ نورمالارىن ەنگىزگەن بولاتىن. سوندىقتان ءبىز «كءۇشتى پرەزيدەنت، ىقپالدى پارلامەنت جانە ەسەپ بەرەتىن ۇكىمەت»فورمۋلاسىنىڭ ورىندالعانىن كۇتەمىز, – دەدى ول.
بۇدان الدىن پرەزيدەنت توقاەۆ 2023 جىلعى 1 قىركۇيەكتەگى جولداۋىندا «ناقتى سالالارعا قاتىستى شەشىمدەردى ازىرلەۋ جانە ورىنداۋ مىندەتى، سونداي-اق تۇپكى ناتيجە ءۇشىن جاۋاپكەرشىلىك تولىعىمەن مينيسترلەرگە جۇكتەلەدى. ويتكەنى ولار ءوزىنىڭ بۇيرىعىمەن جەدەل شەشىم قابىلداپ وتىرۋعا ءتيىس. بۇل – اكىمدەرگە دە قاتىستى ماسەلە»،-دەگەن بولاتىن. سوندا ەل باسشىسى «ەكونوميكالىق ساياساتتىڭ ىسكە اسىرىلۋىنا ۇكىمەت تولىعىمەن جاۋاپ بەرمەك» دەگەندى قاداي ايتقان. پرەزيدەنتتىڭ ايتۋىنشا، ۇكىمەت «بيۋروكراتياعا جانە سوزبۇيداعا سالىنباي، پرەزيدەنت اكىمشىلىگىنە جالتاقتاماي، ەكونوميكانى دەربەس باسقارۋدىڭ بارلىق ءادىس-تاسىلدەرىن قولىندا ۇستاۋعا ءتيىس».
قاڭتار وقيعاسىنىنان كەيىن ۇكىمەتتەگى كەزەكشىلىك كەزەڭدە پرەمەر بولىپ تاعايىندالعان ءاليحان سمايىلوۆتىڭ كابينەتى دوعارىسقا جىبەرىلگەن بولاتىن. بۇگىن Amanat پارتياسىنىڭ توراعاسى ەرلان قوشانوۆ پرەزيدەنتپەن اقىلداسقان تۇردە پرەمەر-مينيستر قىزمەتىنە ولجاس بەكتەنوۆتىڭ كانديداتۋراسىن ۇسىنعان.
ون ءۇشىنشى ۇكىمەتتى باسقارۋعا كەلگەن جاڭا پرەمەر ادىلەت مينيسترلىگىنىڭ تىركەۋ جانە قۇقىقتىق العاشقى كومەك كورسەتۋ قىزمەتى كوميتەتى ءتوراعاسىنىڭ ورىنباسارى، ەكونوميكالىق قىلمىس جانە سىبايلاس جەمقورلىق قارسى كۇرەس اگەنتتىگى ورتالىق اپپاراتىندا دەپارتامەنت باسشىسى، استانا قالاسى اكىمىنىڭ اپپارات باسشىسى، پرەزيدەنت اكىمشىلىگى باسشىسى حاتشىلىعىنىڭ مەڭگەرۋشىسى، استانا قالاسى بويىنشا سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ باسشىسى، اقمولا وبلىسى اكىمىنىڭ ورىنباسارى، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسى قىزمەتتەرىن اتقارعان.
ولجاس بەكتەنوۆ بۇگىن باس مينيستر بولىپ تاعايىندالعانعا دەيىن پرەزيدەنت اكىمشىلىگىنىڭ باسشىسى قىزمەتىندە بولدى.
سەرىك جولداسباي
«ادىرنا» ۇلتتىق پورتالى
