2024 جىلعى 5 اقپاندا مەملەكەت باسشىسى قاسىم-جومارت توقاەۆ "قازاقستان رەسپۋبليكاسىنىڭ ۇكىمەتى تۋرالى" جارلىققا قول قويدى، دەپ حابارلايدى "ادىرنا" ۇلتتىق پورتالى.
ەل پرەزيدەنتى قازاقستان رەسپۋبليكاسى كونستيتۋتسياسىنىڭ 70-بابىنا سايكەس مىناداي قاۋلى ەتتى:
"قازاقستان رەسپۋبليكاسى ۇكىمەتىنىڭ ورنىنان ءتۇسۋى قابىلدانسىن. قازاقستان رەسپۋبليكاسى پرەمەر-ءمينيسترى مىندەتتەرىن ۋاقىتشا اتقارۋ رومان ۆاسيلەۆيچ سكليارعا جۇكتەلسىن. قازاقستان رەسپۋبليكاسى ۇكىمەتىنىڭ مۇشەلەرى ۇكىمەتتىڭ جاڭا قۇرامى بەكىتىلگەنگە دەيىن ءوز مىندەتتەرىن اتقارۋدى جالعاستىرا بەرسىن", - دەلىنگەن قاۋلىدا.
ايتا كەتەيىك، ءاليحان سمايىلوۆ 2022 جىلى قاڭتار وقيعاسىنان كەيىن پرەمەر-مينيستر لاۋازىمىنا 180 كۇن سىناق مەرزىمىمەن تاعايىندالعان بولاتىن. بۇعان دەيىن حالىقتىڭ سول كەزدەگى جاپپاي تولقۋىنا سەبەپ بولعان بىرنەشە فاكتوردى اتاپ وتكەن ەدىك.
سونىمەن قاتار، سمايىلوۆ باسقارعان مينيسترلەر كابينەتى 2023 جىلى ساۋىردە جانە قىركۇيەكتە قايتا جاساقتالدى.
