بۇگىن - الاشوردا كوسەمى ءاليحان نۇرمۇحامەدۇلى بوكەيحانوۆتىڭ ءولىم جازاسىنا كەسىلىپ، اتىلعان كۇنى.
ءاليحان نۇرمۇحامەدۇلى بوكەيحان (1866—1937) — XIX ع. سوڭى مەن XX ع. باسىنداعى قازاق زيالىلارىنىڭ، قوعام جانە مەملەكەت قايراتكەرلەرى قاتارىنداعى اسا ەرەكشە تۇلعا. كورنەكتى قوعام جانە مەملەكەت قايراتكەرى، ۇلت-ازاتتىق جانە الاش قوزعالىسىنىڭ جەتەكشىسى، الاشوردا اۆتونوميالى ۇكىمەتىنىڭ توراعاسى، پۋبليتسيست، عالىم، اۋدارماشى.
تۋرا وسىدان 86 جىل بۇرىن، ياعني 1937 جىلى 27 قىركۇيەكتە ي. ۆ. ستالين باسقارعان كەڭەس وكىمەتىنىڭ جوعارعى سوتى قازاقتى قايتا ەل قىلعان الاشوردا ۇكىمەتىنىڭ كوسەمى ءاليحان بوكەيحاننىڭ كوزىن جويۋا اۋىر ۇكىم كەسىپ، سۇمدىق جازانى سول كۇنى ورىنداعان.
ۇلت كوسەمى الەكەڭنىڭ 1917 جىلى الاشوردا ۇكىمەتىن قۇرىپ، جاڭادان قۇرىلعان قىزىل ۇكىمەتتىڭ ساياسي كوزقاراسى قازاقتىڭ قوعامدىق-ساياسي ومىرىنە قاراما-قارسى ەكەنىن ءبىلىپ، اسكەر جيىپ، اسكەرىن قارۋلاندىرىپ، سوعىس ادىستەرىنە ۇيرەتىپ، كەڭەس وكىمەتىمەن سوعىسقانى ءۇشىن;
ءاليحاننىڭ ەندى دامۋعا بەت العان جاپونيا ۇكىمەتىنىڭ تازا ۇلتتىق مەملەكەت قۇرۋ ۇلگىسىن تاڭداپ، سول جولدا الاشوردا ۇكىمەتىن دامىتپاق بولعانى ءۇشىن;
رەسەي جەرىنەن اۋعان كولچاك پەن اننەنكوۆتارمەن ت.ب. قارۋ-جاراعى مەن يدەيالارى مىقتى كەڭەس ۇكىمەتىنە قارسى توپتارمەن بىرىككەنى ءۇشىن.
كسرو ۇكىمەتىنىڭ ساياساتقا باعىناتىن زاڭ ورىندارى الەكەڭە وسىنداي ەڭ ۇلكەن ءۇش كىنا تاعىپ، اتۋ جازاسىنا بۇيىرىپ، سۇيەگىن ورتەپ جىبەرگەن.
