اقتوبە وبلىسىندا جولاۋشىلار پويىزى رەلستەن شىعىپ كەتتى. بۇل تۋرالى بۇگىن تجد ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
الدىن الا مالىمەتتەر بويىنشا، بۇگىن ساعات 10:30-دا اقتوبە وبلىسى شالقار اۋدانى بەرشۇگىر تەمىرجول ستانتسياسىندا جولاۋشىلار پويىزى مانەۆرلىك لوكوموتيۆپەن سوقتىعىسقان.
سالدارىنان «بىشكەك-سامارا» باعىتىمەن جۇرەتىن №317 جولاۋشىلار پويىزىنىڭ تەپلوۆوزى، №1 ۆاگونى جانە №2 جولاۋشىلار پويىزىنىڭ 3 دوڭعالاقتى جۇبى رەلستەن شىعىپ كەتتى. وقيعا ورنىنا قازاۆياقۇتقارۋ تىكۇشاعى ۇشىپ شىعىپ، قۇتقارۋ بولىمشەلەرى جانە قتج قالپىنا كەلتىرۋ پويىزى جونەلتىلدى، - دەلىنگەن حابارلامادا.
رەلىستەن شىعىپ كەتكەن پويىزدا 200-دەن اسا ادام (قىرعىزستان، رف جانە قازاقستان ازاماتتارى، قتج قىزمەتكەرلەرى) بولعان. جولاۋشىلار زارداپ شەكپەگەن. ولار پويىزدىڭ باسقا ۆاگوندارىنا ورنالاستىرىلدى.
اپاتقا قاتىستى جەدەل شتاب قۇرىلدى. قازىر وقيعانىڭ سەبەبى انىقتالىپ جاتىر.
