مەملەكەت باسشىسى قاسىم-جومارت توقاەۆ ساۋد ارابياسى كورولدىگىنىڭ قازاقستانداعى ەلشىسى فايسال ءال-كاحتانيدى قابىلدادى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
پرەزيدەنت ەلىمىزدىڭ ساۋد ارابياسىمەن ىنتىماقتاستىقتى جان-جاقتى نىعايتۋعا ايرىقشا ءمان بەرەتىنىن ايتتى. سونداي-اق ول مۇحاممەد بەن سالماندى قازاقستانعا مەملەكەتتىك ساپارمەن كەلۋگە شاقىراتىنىن راستادى.
فايسال ءال-كاحتاني ءوز ەلىنىڭ قازاقستانمەن ستراتەگيالىق سەرىكتەستىكتى ودان ءارى تەرەڭدەتۋگە بەيىل ەكەنىن ايتتى. ول جاقىندا قول قويىلعان ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىم، سونداي-اق ەكى ەل اراسىندا كوورديناتسيالىق كەڭەس قۇرۋ ءتيىمدى بايلانىستاردى جانداندىرۋعا جول اشاتىنىنا نازار اۋداردى.
بۇدان بولەك، ديپلومات تاياۋ شىعىستاعى كۇردەلى احۋالعا بايلانىستى قازاقستان پرەزيدەنتىنىڭ كورسەتكەن جان-جاقتى قولداۋىنا ساۋد ارابياسى باسشىلىعىنىڭ شىنايى ريزاشىلىعىن جەتكىزدى. سونىمەن قاتار قازاقستاننىڭ بىتىمگەرلىك كەلىسسوزدەردى كيەلى تۇركىستان شاھارىندا وتكىزۋ تۋرالى باستاماسىنىڭ وزەكتى ەكەنىنە توقتالدى.
قاسىم-جومارت توقاەۆ ايماقتىڭ تۇراقتىلىعىن، قاۋىپسىزدىگى مەن ورنىقتى دامۋىن قامتاماسىز ەتۋ ارەكەتتەرىنە الداعى ۋاقىتتا دا جاردەمدەسۋگە ازىرلىگىن، سونداي-اق ساۋد ارابياسىنا جانە شىعاناقتاعى بارلىق ەلدەرگە تىلەكتەستىگىن ءبىلدىردى.
كەزدەسۋ سوڭىندا پرەزيدەنت قوس كيەنىڭ ساقشىسى، ساۋد ارابياسىنىڭ كورولى سالمان بەن ابدەلازيز ءال ساۋدقا جانە تاق مۇراگەرى، پرەمەر-مينيستر مۇحاممەد بەن سالمان ءال ساۋدقا ىستىق ىقىلاسى مەن سالەمىن جولداپ، باۋىرلاس ساۋد ارابياسى حالقىنا باق-بەرەكە تىلەدى.
