18–21 ناۋرىز ارالىعىندا وڭتۇستىك ءوڭىردى تۇتاس قامتىعان «تۇركىستان وبلىسىنا بالۋان تاس ساپارى» ەكسپەديتسياسى تابىستى ءتامامدالدى.
بۇل ءىس-شارا تۇركىستان وبلىسى اكىمدىگىنىڭ قولداۋىمەن ۇلتتىق باھادۇرلىك مۇرانى جاڭعىرتۋعا باعىتتالعان «Baluan tas» ۇلتتىق سپورت تۇرلەرى جانە مادەنيەتى اكادەمياسىنىڭ ءىرى مادەني-تانىمدىق جوباسى – «قازاق كۇشىنىڭ كارتاسى» اياسىندا بولىپ ءوتتى.
ساپار باعىتى قازاق وركەنيەتىنىڭ تاريحي جانە ساكرالدى كەڭىستىگى – شىمكەنت قالاسى-سايرام اۋدانى، ورداباسى، بايدىبەك، سوزاق، وتىرار، ساۋران اۋداندارى مەن تۇركىستان قالاسىن قامتىدى. توپ جەتەكشىسى – «Baluan tas» اكادەمياسىنىڭ پرەزيدەنتى، كۇش مادەنيەتىن زەرتتەۋشى-PHD دوكتورانت ابىلايحان قالنازاروۆ بولدى.
– «بالۋان تاس فيلوسوفياسى فيزيكالىق جانە ونىمەن تەڭدەي رۋحاني ورىستە دە جاتقان كيەلى پلاتفورما. تىكەلەي اۋىر كوتەرگەن الىپتارمەن قاتار، استارلى ەلدىك سانا كوتەرگەن تۇلعالار دا كوپ. ءبىزدىڭ ماقساتىمىز دا سول زاتتىق تاستارمەن عانا شەكتەلمەي، ونىڭ تەرەڭ ءمانىن اشۋ. قاراتاۋدىڭ كۇنگەيى مەن تەرىسكەيىن قاتار قامتىعان بۇل ساپارىمىزدىڭ ميسسياسى وسىمەن انىقتالادى. بۇل ساپاردىڭ الدىڭعىلارىنان ەرەكشەلىگى – اينالىمعا «سيمۆولدىق بالۋان تاس كوتەرۋ» ۇعىمىن ەنگىزىپ وتىرمىز»، - دەدى ابىلايحان قالنازاروۆ. 
