ەنەرگەتيكا ءمينيسترى ەرلان اقكەنجەنوۆ جۇمىس ساپارى بارىسىندا الماتى ەنەرگەتيكالىق توراپتارىن گازعا كوشىرۋ جونىندەگى ستراتەگيالىق جوبالاردىڭ جۇزەگە اسىرىلۋ بارىسىن تەكسەردى. بۇل تۋرالى مينيسترلىكتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مينيسترلىك باسشىسى جەو-2 جانە جەو-3 قۇرىلىس الاڭدارىن ارالاپ شىقتى. نىسانداردى ارالاۋ بارىسىندا ەرلان اقكەنجەنوۆ مەگاپوليس ءۇشىن جىلۋ ەلەكتر ستانسالارىن گازعا كوشىرۋدىڭ الەۋمەتتىك ماڭىزىن اتاپ ءوتتى.
«الماتى قالاسىندا ەكولوگيالىق جاعداي كۇردەلى. جىلۋ ەلەكتر ستانسالارىن گازعا كوشىرۋ — مەملەكەت باسشىسىنىڭ تاپسىرماسى جانە حالىق الدىنداعى مىندەتىمىز. بۇل ماسەلەدە قاتەلەسۋگە جول جوق»، — دەدى ەنەرگەتيكا ءمينيسترى مەردىگەرلەرگە ارناعان سوزىندە.
جەو-2 نىسانىن ارالاۋ بارىسىندا وڭ ديناميكا بايقالدى. مەردىگەر ۇيىمنىڭ وكىلدەرى 2 جانە 3 ءنومىرلى ىستىق سۋ قازاندىقتارىنىڭ گيدراۆليكالىق سىناقتاردان ءساتتى وتكەنىن حابارلاپ، جۇمىس كەستەگە سايكەس جۇرگىزىلىپ جاتقانىن جەتكىزدى.
الايدا جەو-3 قۇرىلىس الاڭىنداعى جاعدايدى ۆەدومستۆو باسشىسى قاتاڭ سىنعا الدى. مينيستر جوبانىڭ بەكىتىلگەن كەستەدەن كەش جۇرگىزىلىپ جاتقاندىعىن العا تارتىپ، باس مەردىگەر ۇيىمنىڭ جۇمىستى جۇيەلى ۇيىمداستىرا الماعانىن اتاپ ءوتتى.
قۇرىلىس كومپانيالارىنىڭ باسشىلارى مەن وكىلدەرىنە ەرلان اقكەنجەنوۆ رەسۋرستاردى شۇعىل جۇمىلدىرۋدى تالاپ ەتىپ، مەردىگەرلەردىڭ جەكە جاۋاپكەرشىلىگىن ناقتىلادى.
اتالعان جوبانىڭ جۇزەگە اسىرىلۋى ەنەرگەتيكا مينيسترلىگىنىڭ تۇراقتى باقىلاۋىنا الىنىپ، جاۋاپتى تۇلعالارعا اپتالىق ەسەپ بەرۋ مىندەتتەلدى.
