فوتو: Sana
سيريا اراب رەسپۋبليكاسىنىڭ پرەزيدەنتى احماد اش-شاراا ناۋرىز مەيرامىن مەملەكەتتىك دەڭگەيدە تانۋ تۋرالى جارلىققا قول قويدى. بۇل تۋرالى سيريانىڭ رەسمي SANA اقپارات اگەنتتىگى جازدى، دەپ حابارلايدى “ادىرنا”.
جارلىقتىڭ بەسىنشى بابىنا سايكەس، 21 ناۋرىز — ناۋرىز مەيرامى سيريانىڭ ۇلتتىق مەرەكەسى رەتىندە رەسمي اقىلى دەمالىس كۇنى بولىپ جاريالاندى. وسىعان وراي، مەملەكەتتىك قىزمەتكەرلەر اتالعان كۇنى جالاقىسى ساقتالاتىن دەمالىسقا شىعا الادى.
«ناۋرىز مەيرامى (21 ناۋرىز) كوكتەم مەن باۋىرلاستىقتى بەينەلەيتىن ۇلتتىق مەرەكە رەتىندە سيريا اراب رەسپۋبليكاسىنىڭ بۇكىل اۋماعىندا رەسمي اقىلى دەمالىس كۇنى بولىپ جاريالانادى»، – دەلىنگەن جارلىقتىڭ بەسىنشى بابىندا.
قۇجاتتا سونداي-اق كۇرد ءتىلىن اراب تىلىمەن قاتار ۇلتتىق ءتىل رەتىندە مويىنداۋ جونىندە نورما ەنگىزىلگەن. بۇدان بولەك، ەتنيكالىق جانە تىلدىك بەلگىلەر بويىنشا كەمسىتۋشىلىككە زاڭ جۇزىندە تىيىم سالىناتىنى اتاپ وتىلگەن.
بۇل شەشىم ەلدە ون جىلدان استام ۋاقىتقا سوزىلعان قاقتىعىستان كەيىن قابىلدانىپ وتىرعان كەڭ اۋقىمدى رەفورمالار پاكەتى اياسىندا جۇزەگە اسىرىلدى. رەفورمالاردىڭ نەگىزگى ماقساتى – سيريا قوعامىنداعى بىرلىكتى نىعايتۋ، سونداي-اق ەلدەگى ءارتۇرلى ەتنومادەني قاۋىمداستىقتاردىڭ قۇقىقتارىن مويىنداۋ جانە قورعاۋ.
ساراپشىلاردىڭ پىكىرىنشە، ناۋرىزدى مەملەكەتتىك مەرەكە رەتىندە تانۋ سيرياداعى كوپۇلتتى قوعامنىڭ مادەني ارتۇرلىلىگىن قۇرمەتتەۋگە باعىتتالعان ماڭىزدى قادامداردىڭ ءبىرى بولىپ سانالادى.
