قىتايدا ۇشاق ۇلگىسىندەگى FP-985 Taurus اتتى ءىرى ۇشقىشسىز ۇشۋ اپپاراتى العاش رەت بيىك تاۋلى ايماق ۇستىمەن ۇزاق قاشىقتىققا لوگيستيكالىق رەيس جاسادى، دەپ حابارلايدى "ادىرنا" ۇلتتىق پورتالى.
ۇشقىشسىز اپپارات 14 قاڭتار العاشقى ۇشۋ جوسپارىن ورىنداعان
قۇرىلعى قىتايدىڭ وڭتۇستىك-باتىسىنداعى سيتسزان اۆتونومدى اۋدانىنداعى نينگچي قالاسىنان سىچۋان پروۆينتسياسىنداعى ميانيان قالاسىنا دەيىن ۇشىپ، ءبىر باعىتتاعى قاشىقتىق 1100 شاقىرىمنان استى.
ۇشۋ بارىسىندا درون سيتسزان وڭىرىنەن اۋىل شارۋاشىلىعى ونىمدەرىن تاسىمالدادى. بۇل رەيس قىتايدىڭ بيىك تاۋلى ايماقتارىندا ءىرى جۇك دروندارىن پايدالانا وتىرىپ لوگيستيكالىق باعىتتى سىناۋدىڭ العاشقى راستالعان مىسالى بولدى.
مالىمەتكە سايكەس، FP-985 Taurus درونىنىڭ ەڭ جوعارى ۇشۋ سالماعى 5,7 توننا، ال پايدالى جۇك كوتەرگىشتىگى 2 توننادان اسادى. اپپاراتتىڭ ۇشۋ قاشىقتىعى 2000 شاقىرىمنان جوعارى.
اتالعان اپپارات سىچۋان مەن سيتسزان اراسىنداعى لوگيستيكالىق مارشرۋتتاردى قالىپتاستىرۋعا ارنالعان. بۇل جەرگىلىكتى اگرارلىق ونىمدەردى سىرتقا شىعارۋدى ارتتىرىپ، بيىك اسۋدىڭ قولجەتىمسىز ايماقتارىنا جۇك جەتكىزۋدى جەڭىلدەتۋگە مۇمكىندىك بەرەدى.
FP-985 Taurus ەكسترەمالدى جاعدايلاردا جۇمىس ىستەۋگە بەيىمدەلگەن. ول جوعارى بيىكتىكتە، سۋىق كليماتتا جانە تۇز مولشەرى جوعارى ورتادا تۇراقتى ۇشا الادى. مۇز قاتۋعا قارسى جۇيەلەرى مەن قاتتى جەلگە توزىمدىلىگى اپپاراتقا كەز كەلگەن اۋا رايىندا ۇزاق مەرزىمدى وپەراتسيالاردى ورىنداۋعا جول اشادى.
