Қытайда ұшақ үлгісіндегі FP-985 Taurus атты ірі ұшқышсыз ұшу аппараты алғаш рет биік таулы аймақ үстімен ұзақ қашықтыққа логистикалық рейс жасады, деп хабарлайды "Адырна" ұлттық порталы.
Ұшқышсыз аппарат 14 қаңтар алғашқы ұшу жоспарын орындаған
Құрылғы Қытайдың оңтүстік-батысындағы Сицзан автономды ауданындағы Ньингчи қаласынан Сычуань провинциясындағы Мяньян қаласына дейін ұшып, бір бағыттағы қашықтық 1100 шақырымнан асты.
Ұшу барысында дрон Сицзан өңірінен ауыл шаруашылығы өнімдерін тасымалдады. Бұл рейс Қытайдың биік таулы аймақтарында ірі жүк дрондарын пайдалана отырып логистикалық бағытты сынаудың алғашқы расталған мысалы болды.
Мәліметке сәйкес, FP-985 Taurus дронының ең жоғары ұшу салмағы 5,7 тонна, ал пайдалы жүк көтергіштігі 2 тоннадан асады. Аппараттың ұшу қашықтығы 2000 шақырымнан жоғары.
Аталған аппарат Сычуань мен Сицзан арасындағы логистикалық маршруттарды қалыптастыруға арналған. Бұл жергілікті аграрлық өнімдерді сыртқа шығаруды арттырып, биік асудың қолжетімсіз аймақтарына жүк жеткізуді жеңілдетуге мүмкіндік береді.
FP-985 Taurus экстремалды жағдайларда жұмыс істеуге бейімделген. Ол жоғары биіктікте, суық климатта және тұз мөлшері жоғары ортада тұрақты ұша алады. Мұз қатуға қарсы жүйелері мен қатты желге төзімділігі аппаратқа кез келген ауа райында ұзақ мерзімді операцияларды орындауға жол ашады.
