10 قاڭتاردا، قازاق ادەبيەتىنىڭ دامۋىنا زور ۇلەس قوسقان كورنەكتى جازۋشى ءىلياس ەسەنبەرليننىڭ تۋعان كۇنىمەن قاتار قازاق ادەبيەتى كۇنى اتالىپ ءوتىپ جاتىر. بۇل مەرەكە 2019 جىلى قاراعاندى قالاسىندا رەسپۋبليكالىق Qazaq club باستاماسىمەن قازاق ۇلتتىق كۇنتىزبەسىنە ەنگىزىلگەن.
ءىلياس ەسەنبەرلين – قازاق ادەبيەتىندە ۇلتتىق تاريحىمىزدىڭ بىرنەشە كەزەڭىن قامتيتىن تاريحي شىعارمالار جازعان تۇڭعىش قالامگەر. ونىڭ «كوشپەندىلەر» رومانى قازاق حالقىنىڭ تاريحىن جاس ۇرپاققا ناسيحاتتاپ، ۇلتتىق سانا مەن تاربيەنى وياتۋدا ايرىقشا ءرول اتقارعان. ىلەكەڭنىڭ شىعارماشىلىعى بۇگىنگى تاڭدا قازاق ادەبيەتىنىڭ فەنومەنى رەتىندە باعالانادى.
قازاقستاننىڭ ەڭبەك ەرى مۇحتار شاحانوۆ بارشا قازاقستاندىقتاردى مەرەكەمەن قۇتتىقتادى.
«2019 جىلى قاراعاندى قالاسىندا رەسپۋبليكالىق "Qazaq club" باستاماسىمەن ۇلت قۇندىلىقتارىن ساقتاۋ جانە ناسيحاتتاۋعا باعىتتالعان قازاق كۇنتىزبەسىندە 10 قاڭتار – قازاق ادەبيەتى كۇنى رەتىندە بەلگىلەندى. بۇل كۇنى 1915 جىلى قازاقتىڭ دارىندى جازۋشىسى ءىلياس ەسەنبەرلين دۇنيەگە كەلگەن. ءىلياس ەسەنبەرلينگە دەيىن قازاق ادەبيەتىندە ۇلتتىق تاريحىمىزدىڭ بىرنەشە كەزەڭىن قامتيتىن تاريحي شىعارمالار جوق ەدى. ىلەكەڭنىڭ باستى جەتىستىگى – ءتول تاريحىمىزدى روماندار ارقىلى جاڭعىرتۋىندا.
تاريحي روماندارى ارقىلى ۇلتتىق سانا مەن تاربيەنى وياتقان كورنەكتى جازۋشىنىڭ دۇنيەگە كەلگەن كۇنى قازاق ادەبيەتى كۇنى رەتىندە اتالىپ ءوتۋى – كەرەمەت باستاما»، – دەپ اتاپ ءوتتى.
اقىن سەرىك اقسۇڭقارۇلى دا بارشا قازاقستاندىقتاردى مەرەكەمەن قۇتتىقتاپ، ءىلياس ەسەنبەرليننىڭ شىعارمالارى ارقىلى جاستاردىڭ ۇلتتىق مۇراسىن تانىپ، بويىنا ءسىڭىرۋ مۇمكىندىگىنە باسا نازار اۋداردى.
ء"ىلياس ەسەنبەرليننىڭ شىعارماشىلىعى – قازاق ادەبيەتىنىڭ فەنومەنى. ونىڭ تۋىندىلارى ارقىلى جاستارىمىز ءوز تاريحىن، ۇلتتىق مۇراسىن تانىپ، ونى بويىنا سىڭىرۋگە مۇمكىندىك الادى", - دەدى اقىن.
