وزبەكستاندا جەرگىلىكتى تۇرعىن "قاتتى كۇيزەلىستىڭ سالدارىنان" شەگە جۇتىپ قويعان، دەپ حابارلايدى «ادىرنا» ءتىلشىسى.
سامارقاندتىق دارىگەرلەر ءىشىنىڭ قاتتى اۋىرۋى بەلگىلەرىمەن اۋرۋحاناعا تۇسكەن 29 جاستاعى ەر ادامعا شۇعىل وپەراتسيا جاساعان. تەكسەرۋ ناتيجەسىندە ونىڭ اسقازان-ىشەك جولىنان كوپ مولشەردە مەتالل زاتتار — شەگەلەر مەن بۇراندالار انىقتالعان.
مەديتسينالىق ماماندار جەدەل حيرۋرگيالىق ارالاسۋ قاجەت دەگەن شەشىم قابىلداپ، وپەراتسيانى لاپاروتوميا جانە گاستروستوميا ادىستەرىمەن جۇرگىزگەن. ناتيجەسىندە ناۋقاستىڭ ءىش قۋىسىنان جالپى سالماعى 200 گرامنان اساتىن مەتالل زاتتار الىنعان. دارىگەرلەردىڭ ايتۋىنشا، وپەراتسيا شامامەن ءبىر ساعاتقا سوزىلعان.
«قازىرگى ۋاقىتتا ناۋقاستىڭ جاعدايى قاناعاتتانارلىق دەپ باعالانىپ وتىر. ول وزدىگىنەن قوزعالا باستادى جانە دارىگەرلەردىڭ باقىلاۋىندا»، – دەيدى ماماندار.
الدىن الا مالىمەت بويىنشا، ەر ادام قاتتى سترەسس جاعدايىندا بولىپ، ءوز ارەكەتىنە ەسەپ بەرمەي مەتالل زاتتاردى جۇتىپ قويعان.
ايتا كەتەيىك، مەديتسينادا مۇنداي ءىس-ارەكەت، ياعني جەۋگە جارامسىز زاتتاردى جەۋ كوبىنە اللوتريوفاگيا نەمەسە «پيك» سيندرومى رەتىندە سيپاتتالادى. بۇل جاعداي پسيحيكالىق بۇزىلىستار اياسىندا نەمەسە اعزادا ميكروەلەمەنتتەردىڭ قاتتى تاپشىلىعى كەزىندە اسقىنۋى مۇمكىن.
