“جازۋشىلارعا ءۇي سالىنسىن”، “جازۋشىلارعا ءويتسىن، ءسويتسىن، ءبۇيتسىن”، “اقىندارعا باسپانا بەرىلسىن”، “اقىندارعا تەگىن كىتاپ شىعارىپ بەرسىن...” نەگە؟ نە ءۇشىن؟ جازۋشى، اقىننىڭ باسقا ماماندىقتاردان قانداي ارتىقشىلىعى بار؟!. كەڭەستەر وداعى كەزىندە اقىن-جازۋشىلاردى يدەولوگيا قۇرالى رەتىندە پايدالانعان. كومپارتيانىڭ تاپسىرىسىن ورىنداعان. ال تاۋەلسىز قازاقستانعا نە ءۇشىن كەرەك ولار؟
ۇلتتىق يدەولوگياعا قاتىستى ماسەلەلەردە نەمەسە حالىقتىڭ پروبلەماسىن ايتۋدا ءۇنىن شىعارۋعا قورقاتىن اقىن-جازۋشىلار وتە كوپ. مىسالى، جەلتوقسان ارداگەرى، ارىپتەسىمىز ميربولات مىرزاتايۇلىن “قازاقشا سويلە دەپتى بىرەۋگە” دەپ، 4 جىلعا سوتتايىن دەپ جاتىر. ادۆوكاتى شىرىلداپ ءجۇر “قۇزىرلى ورگاندار زاڭدى بەلشەدەن باستى” دەپ. قىڭق دەگەن اقىن-جازۋشىلاردان كىم بار؟!
الماتىداعى 224 مەكتەپتى ارالاس قىلماسىن، تازا قازاق مەكتەبى بولسىن دەپ نامىسقا تىرىسىپ، شىرىلداپ جۇرگەن اتا-انالارعا اراشا تۇسكەن قاي جازۋشى مەن اقىندى بىلەمىز؟! اۋ، ولاردىڭ وقىرمانى سول قازاقتىڭ قارادومالاقتارى عوي!!!
بىزدەگى اقىن-جازۋشىلاردىڭ كوپشىلىگى - ەگويست: ءتىرى كەزىندە كىتابى شىقسىن، جاعدايىن ۇكىمەت جاساسىن، ولە قالسا، توپ ەتكىزىپ “كەڭسايعا” جەرلەسىن، سوسىن ارتىنان تۇككە تۇرمايتىن كەيبىر دەپۋتات، مينيستر نە تاعى بىرەۋلەر كەلىپ، “ويباااي، ىستەگەنىڭنەن ىستەيتىنىڭ كوپ ەدى! نەگە ءولىپ قالدىڭ؟!” دەپ وتىرىك جىلاعانى، “قايعىرعانى” كەرەك.
سوسىن قولىنان بوق كەلمەسە دە، بالا-شاعا، نەمەرە-شوبەرە، جيەندەرىن كور-جەرگە تىقپالايدى. ايلىعى مەن شايلىعى جاقسى جەرگە جۇمىسقا تۇرعىزۋ عوي سول باياعى.
جازۋشى-اقىنداردا “بەس بەرەسى، التى الاسىم” جوق. جازسىن كىتابىن، ساتسىن، پايدا تاپسىن. مەملەكەتكە، قاراپايىم حالىققا ماسىل بولماسىن بىراق. سپونسورلارمەن جۇمىس ىستەسىن (ەگەر سپونسورلارعا اقىن-جازۋشىلار قاجەت بولسا). تىرشىلىك قىلسىن. مەملەكەتكە بەرسىن قايتا شىن مىقتى بولسا.
حالىقتىڭ جاعدايى ناشار قازىر. ءسىڭىرى شىققان كەدەيلەر كوبەيگەن. بالا-شاعاسى تۇرماق، قارا باسىن اسىراۋ مۇڭ بولعاندار كوپ. قازاقستاندا قاراپايىم ماماندىق يەلەرى ەشكىمگە مىندەتسىمەي، ادال ەڭبەگىمەن كۇنىن كورىپ ءجۇر: بىرەۋدەن - جاقسى، بىرەۋدەن - جامان… ايتەۋىر، تىربىڭداعان تىرشىلىك. اقىن-جازۋشىلار دا سولاي بولۋى ءتيىس.
