20 جەلتوقسان كۇنى استانا قالاسىنداعى قر ۇلتتىق مۋزەيىندە «ۇلتتىق كود – ۇرپاققا امانات» اتتى رەسپۋبليكالىق ەتنوفورۋم ءوتتى. ءىس-شارا ۇلتتىق قۇندىلىقتاردى دارىپتەۋ، ءداستۇرلى ونەردى جاڭعىرتۋ جانە كرەاتيۆ يندۋستريانىڭ دامۋ باعىتتارىن تالقىلاۋعا ارنالدى.
فورۋمعا ەلوردالىق جانە وڭىرلەردەن كەلگەن قولونەر شەبەرلەرى، ديزاينەرلەر، مادەنيەت جانە كرەاتيۆتى يندۋستريا وكىلدەرى، قوعام بەلسەندىلەرى قاتىستى. جيىننىڭ باستى ماقساتى – ۇلتتىق كودتىڭ ماڭىزىن اشىپ، ونى جاس ۇرپاق ساناسىنا ءسىڭىرۋ جولدارىن ورتاق الاڭدا تالقىلاۋ.
ەتنوفورۋم اياسىندا ۇلتتىق مادەنيەتتىڭ قازىرگى تىنىسى مەن بولاشاعىنا قاتىستى مازمۇندى پىكىر الماسۋ ءوتتى. قولونەرشىلەر مەن تىگىنشىلەر ءداستۇرلى ونەردى زاماناۋي فورماتتا دامىتۋ، ۇلتتىق ناقىشتاعى بۇيىمداردى كۇندەلىكتى قولدانىسقا ەنگىزۋ ماسەلەلەرىن كوتەردى. سونداي-اق وتاندىق برەندتەردى قولداۋ، كرەاتيۆ يندۋسترياداعى جۇيەلى تۇيتكىلدەر دە نازاردان تىس قالمادى.
پانەلدىك سەسسيا بارىسىندا قر پارلامەنتى ءماجىلىسىنىڭ دەپۋتاتتارى ەكاتەرينا سمولياكوۆا، ولجاس قۇسپەكوۆ جانە نۇرگۇل تاۋ ءسوز سويلەپ، ۇلتتىق كودتىڭ قوعامنىڭ رۋحاني تۇتاستىعىن ساقتاۋداعى رولىنە توقتالدى. سپيكەرلەر ۇلتتىق قۇندىلىقتاردى تەك مادەني مۇرا رەتىندە ەمەس، زاماناۋي قوعامدى بىرىكتىرەتىن تىرەك رەتىندە قاراستىرۋ قاجەتتىگىن اتاپ ءوتتى.
سونىمەن قاتار فورۋم اياسىندا وتكەن پىكىرتالاستاردا استانا قالاسى ءماسليحاتىنىڭ دەپۋتاتى، Saukele برەندى مەن Sun Events كومپانياسىنىڭ نەگىزىن قالاۋشى ساۋلە ءساميدين، قوعام قايراتكەرى باعيلا بالتابايقىزى، KuDAGI برەندىنىڭ نەگىزىن قالاۋشى ديزاينەر عاليا قۇرمانباەۆا ۇلتتىق ونەردى بۇگىنگى ومىرمەن ۇشتاستىرۋدىڭ ناقتى جولدارىنا توقتالدى. ولار ۇلتتىق قۇندىلىقتاردى تۇرمىستىق مادەنيەت پەن زاماناۋي ءسان يندۋسترياسىنا ەنگىزۋدىڭ ماڭىزىن اتاپ ءوتتى.
فورۋمدا قولونەرشىلەردى قولداۋ ماسەلەسى دە كەڭىنەن قوزعالدى. «رەسپۋبليكا» پارتياسى استانا قالالىق فيليالى ايەلدەر قاناتىنىڭ وكىلدەرى قاۋىمداستىقتاعى شەبەرلەردىڭ ونىمدەرىن نارىققا شىعارۋ، ساۋدا ورىندارىنان ارنايى الاڭدار ءبولۋ، گرانتتىق قولداۋلار كورسەتۋ قاجەتتىگىن تىلگە تيەك ەتتى.
ال «حاس شەبەر» قاۋىمداستىعىنىڭ پرەزيدەنتى زيۋار جۇمانوۆا قولونەرشىلەردىڭ ورتاق پلاتفورماسىنىڭ جوقتىعى – سالاداعى باستى ماسەلەلەردىڭ ءبىرى ەكەنىن ايتىپ، بۇل باعىتتا جۇيەلى شەشىمدەر قابىلداۋ كەرەكتىگىن جەتكىزدى. ونىڭ ايتۋىنشا، قاۋىمداستىق قۇرامىندا 100-دەن استام شەبەر بار جانە الداعى ۋاقىتتا قولونەرشىلەردىڭ كاسىبي مەرەكەسىن بەلگىلەۋ جوسپاردا.
فورۋم باعدارلاماسى اياسىندا كورمە، شەبەرلىك ساباقتارى، ەتنو-باعدارلاما ۇيىمداستىرىلىپ، قاتىسۋشىلارعا ۇلتتىق ونەردىڭ سان قىرى تانىستىرىلدى. ەلىمىزدىڭ تۇكپىر-تۇكپىرىنەن كەلگەن 300-گە جۋىق قولونەر جاناشىرى قاتىسقان ەتنوفورۋم ۇلتتىق قۇندىلىقتاردى ناسيحاتتاۋعا ارنالعان ماڭىزدى الاڭعا اينالدى.
