بۇگىن وبلىس اكىمى ناريمان تورەعاليەۆ كورەيالىق ينۆەستورلارمەن كەزدەستى. جيىن بارىسىندا ءوڭىر اۋماعىندا تۇرمىستىق قالدىقتاردى جاعۋ جانە سۇرىپتاۋ زاۋىتتارىن سالۋ ماسەلەلەرى تالقىلاندى.
بۇل باس قوسۋ وبلىس باسشىسىنىڭ كورەيا رەسپۋبليكاسىنا بارعان قىزمەتتىك ساپارى اياسىندا ورناتىلعان ىنتىماقتاستىقتىڭ جالعاسى ەكەنىن اتاپ وتكەن ءجون. جاسالعان ءىسساپار بارىسىندا تاراپتار سەرىكتەستىك ورنىتىپ، زاماناۋي قالدىقتاردى ورتەۋ جانە قايتا وڭدەۋ تەحنولوگيالارىن قولدانا وتىرىپ، قالدىقتاردى كادەگە جاراتۋ جوبالارىن بىرلەسىپ ىسكە اسىرۋ جونىنەگى مەموراندۋمعا قول قويعان بولاتىن. بۇگىنگى كەزدەسۋ ورتاق مۇددە ماسەلەلەرىن جان-جاقتى قاراۋعا جانە ولاردى ءارى قاراي جۇزەگە اسىرۋ جولدارىن ناقتىلاۋعا مۇمكىندىك بەردى.
«بۇل جوبالاردى ىسكە اسىرۋ تەك قانا ەكىجاقتى ىنتىماقتاستىقتى نىعايتۋعا عانا ەمەس، سونداي-اق جاڭا جۇمىس ورىندارىن قۇرۋعا جانە قالدىقتاردى وڭدەۋ سالاسىندا زاماناۋي تەحنولوگيالاردى ەنگىزۋگە دە سەپتىگىن تيگىزەدى. بىرلەسكەن باستامامىزدىڭ تابىستى بولۋى ءۇشىن ءبىز ءوز تاراپىمىزدان قاجەتتى قولداۋدى كورسەتۋگە دايىنبىز»، – دەپ اتاپ ءوتتى ءوڭىر باسشىسى.
تاراپتار جوبانى ىسكە اسىرۋ كەزەڭدەرىن، دايىندىق جانە قۇرىلىس جۇمىستارىنىڭ مەرزىمدەرىن ناقتىلاي وتىرىپ، ىنتىماقتاستىقتى جالعاستىرۋعا كەلىستى.
اتالعان باستامانى جۇزەگە اسىرۋ ءوڭىردىڭ تۇرمىستىق قالدىقتاردى باسقارۋ جۇيەسىن جاڭعىرتۋ جانە وسى سالاعا وزىق تەحنولوگيالاردى ەنگىزۋ بويىنشا ستراتەگيالىق جوسپارىنىڭ ءبىر بولىگىن قۇرايدى.
ەستەرىڭىزگە سالا كەتەيىك، اعىمداعى جىلدىڭ قاراشا ايىنىڭ اياعىندا باتىس قازاقستان وبلىسىنىڭ اكىمى ناريمان تورەعاليەۆ باستاعان دەلەگاتسيا كورەيا رەسپۋبليكاسىنا جۇمىس ساپارىمەن بارىپ، ەكىجاقتى ىنتىماقتاستىقتى نىعايتۋعا باعىتتالعان ءتۇرلى سالالارداعى بىرقاتار مەموراندۋدارعا قول قويعان بولاتىن.
