بيىل مۋزىكالىق جاس كورەرمەن تەاترىنا 5 جىل تولىپ وتىر. وسى شاعىن عانا ۋاقىت ىشىندە تەاتر جاس كورەرمەنگە عانا ەمەس، كەڭ اۋديتورياعا ارنالعان مازمۇندى، ويلى ءارى كوركەم قويىلىمدارىمەن تانىلىپ ۇلگەردى. مەرەيتوي اياسىندا تەاتر ۇجىمى ءبىر اپتا بويى MTUZ Fest دەپ اتالاتىن ىشكى فەستيۆال ۇيىمداستىرىپ، وزدەرىنىڭ شىعارماشىلىق ىزدەنىستەرى مەن كوركەمدىك دەڭگەيىن ساراپقا سالۋدا.
اتالعان فەستيۆالدىڭ شىمىلدىعىن اشقان العاشقى قويىلىم – ەرمەك امانشاەۆتىڭ «شاكارىم» مۋزىكالىق دراماسى بولدى. بۇل تاڭداۋ دا كەزدەيسوق ەمەس. ويتكەنى «شاكارىم» – تەاتردىڭ كوركەمدىك باعىتىن، رۋحاني ۇستانىمىن، بيىك ماقسات-مۇددەسىن ايقىن كورسەتەتىن سالماقتى تۋىندى بولدى
مۋزىكالىق دراما قازاقتىڭ ۇلى ويشىلى، اقىنى ءارى كومپوزيتورى شاكارىم قۇدايبەردىۇلىنىڭ ءومىرى مەن شىعارماشىلىق مۇراسىن ارقاۋ ەتەدى.
قويىلىم كورەرمەندى تاريحي تۇلعانىڭ تاعدىرىمەن عانا ەمەس، ار-وجدان، ادىلەت، رۋحاني تازالىق سەكىلدى ماڭگىلىك ۇعىمدارمەن بەتتەستىرەدى.
قازاق رۋحانياتىنىڭ اسپانىندا جۇلدىزداي جارق ەتىپ، بار سانالى عۇمىرىن حالقىنىڭ ساناسىن وياتۋعا ارناعان شاكارىم قۇدايبەردىۇلى – اقيقات ىزدەۋشى كەمەل ويدىڭ يەسى، ۇلتىنىڭ رۋحاني ۇستازى. ونى تانۋ ارقىلى وتكەنىمىزگە باعا بەرىپ، كەلەشەگىمىزگە ايقىن باعدار جاساي الامىز. شاكارىمنىڭ ۇلى مۇراسى – حالقىمىزدىڭ رۋحاني جاڭعىرۋىنا جول اشار ماڭگىلىك شامشىراق ەكەنى سپەكتاكل بارىسىندا تەرەڭ سەزىلەدى.
مۋزىكالىق درامادا شاكارىمنىڭ اقتاڭداق كەزەڭدەردى باستان وتكەرگەن تاعدىرى، ەل جاعدايىنا الاڭداعان ازاماتتىق ويى، رۋحاني ىزدەنىستەرى، ادىلەت پەن ماحابباتقا دەگەن كوزقاراسى كوركەمدىك تۇرعىدا ورىلەدى. قويىلىم بىرنەشە ساحنالىق كورىنىستەردەن تۇرىپ، ويشىلدىڭ بالا كەزىنەن ءومىرىنىڭ سوڭىنا دەيىنگى كۇردەلى جولىن قامتيدى.
سپەكتاكلدە اباي قۇنانبايۇلى مەن شاكارىم اراسىنداعى رۋحاني ساباقتاستىق ەرەكشە مانگە يە. ابايدىڭ اعالىق قامقورلىعى، ۇستازدىق بولمىسى جانە شاكارىمنىڭ سول ىزگى جولدى جالعاستىرعان ازاماتتىق ۇستانىمى كورەرمەنگە تەرەڭ وي سالادى. بۇل بايلانىس – قازاق وي تاريحىنىڭ ۇزىلمەس جەلىسى رەتىندە بەرىلگەن.
شاكارىم بەينەسىن ساحنادا سومداعان ايان وتەپبەرگەن («دارىن» مەملەكەتتىك جاستار سىيلىعىنىڭ لاۋرەاتى) مەن قازىبەك ەسقارا ويشىلدىڭ ىشكى دراماسىن، جان ارپالىسىن، رۋح بيىگىن سەنىمدى جەتكىزە ءبىلدى. اكتەرلىك ويىن كورەرمەن شىنايى قابىلدادى. قويىلىم بارىسىندا كورەرمەنگە ەرەكشە اسەر قالدىرعان سيمۆولدىق بەينەلەردىڭ ءبىرى – اقسۇڭقار وبرازى. ءۇنسىز كەيىپكەر بولا تۇرا، ونىڭ نازىك تە ماعىنالى ءبيى ساحناداعى وقيعالارعا وزگەشە تەرەڭدىك بەرىپ تۇردى. اقسۇڭقار بەينەسى شاكارىمنىڭ ەركىن ويىنىڭ، بيىك رۋحىنىڭ كوركەم سيمۆولىنا اينالدى. بۇل بەينە قويىلىمنىڭ پوەتيكالىق ءتىلىن كۇشەيتىپ، كورەرمەننىڭ ىشكى سەزىمىنە تىكەلەي اسەر ەتتى.
ال قويىلىمداعى ەڭ اسەرلى ساتتەردىڭ ءبىرى – شاكارىم مەن ۇلى احات اراسىنداعى ساحنا. ەلدەن جىراقتا جۇرگەن اكەسىن ەلگە قايتارماق بولعان احاتتىڭ كوز جاسىنا ەرىك بەرگەن ءساتى، شاكارىمنىڭ ونى توقتاتىپ:
ء«اي، سەن ماعان رەنجۋلى كەتسەڭ، ەرتەڭ قابىرعاما باتارى ءسوزسىز… كەل بەرى» – دەپ ماڭدايىنان يىسكەپ، باۋىرىنا باسۋى كورەرمەننىڭ جۇرەگىن ەلجىرەتپەي قويمادى. بۇل كورىنىس شاكارىمنىڭ تەك ويشىل عانا ەمەس، تەرەڭ ادامي بولمىسىن اشىپ كورسەتتى.
قويۋشى رەجيسسەر اسحات ماەميروۆ تاريحي تۇلعانىڭ تاعدىرىن زاماناۋي كوركەمدىك تىلدە سويلەتىپ، مۋزىكا، پلاستيكا مەن دراماتۋرگيانى شەبەر ۇيلەستىرە العان. سپەكتاكلدىڭ كوركەمدىك تۇتاستىعى مەن ەموتسيونالدىق اسەرى وسى رەجيسسەرلىك شەشىمدەردىڭ ناتيجەسى دەۋگە بولادى. 
MTUZ Fest اياسىنداعى قويىلىمداردى قازىلار القاسى باعالايدى. قازىلار قۇرامىندا قر حالىق ءارتىسى، قازاق ونەرىنىڭ اڭىزى ءارى قىز جىبەگى مەرۋەرت قاراتايقىزى وتەكەشوۆا، ونەرتانۋ بويىنشا PhD دوكتورى، كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ دوتسەنتى نارتاي ەسكەندىروۆ، ونەرتانۋ عىلىمدارىنىڭ ماگيسترى بەيبىت الكەەۆا، جاس تەاترتانۋشى باحتيار تۇرسىن، تەاتر ديرەكتورىنىڭ ورىنباسارى الماس شومان بار.
سپەكتاكل سوڭىندا كورەرمەن ۇزاق ۋاقىت بويى ورىندارىنان تۇرىپ، توقتاۋسىز قوشەمەت كورسەتىپ، قويىلىمعا دەگەن ريزاشىلىعىن ءبىلدىردى. مۋزىكالىق جاس كورەرمەن تەاترىنىڭ 5 جىلدىق مەرەيتويىن اشقان «شاكارىم» مۋزىكالىق دراماسى – تەاتردىڭ كوركەمدىك ءوسۋ جولىن، رۋحاني بيىگىن ايقىن كورسەتكەن ماڭىزدى بەلەس بولدى.
