جەلتوقسان وقيعاسىنىڭ قۇربانى، حالىق قاھارمانى ءلاززات اسانوۆانىڭ اناسى التىناي اسانوۆا قىزىنىڭ قازا تاپقان كۇنىن ەسكە الىپ، جۇرەگىن اۋىرتقان ەستەلىكتەرىمەن بولىسكەن سۇحباتى تارادى، دەپ حابارلايدى "ادىرنا" ۇلتتىق پورتالى.
التىناي اسانوۆانىڭ بىرنەشە ۋاقىت بۇرىن بەرگەن سۇحباتى الەۋمەتتىك جەلىدە تاراعان. ول 16 جاسىندا قىرشىن كەتكەن ءلاززات اسانوۆانىڭ ءولىمى ءالى كۇنگە دەيىن جۇمباق كۇيىندە قالىپ وتىرعانىن ايتادى.
اناسى قىزىنىڭ دەنەسىندە باسقا جاراقات بولماعانىن، تەك باسىنان اۋىر سوققى العانىن مالىمدەدى.
ء"لاززات بىردەن قايتىس بولعان. باسى، شۇيدەسى جارىلعان ەدى. «5-قاباتتان قۇلاپ ءولدى» دەگەن سوڭ، دەنەسى ۇگىتىلىپ، سۇيەكتەرى سىنعان شىعار دەپ ويلادىم. بىراق ولاي بولمادى. دەنەسى ءبۇتىن، تەك باسى عانا جارالانعان. باسقا ەش جەرىندە جاراقات جوق ەدى", – دەدى ول بىرنەشە جىل بۇرىن بەرگەن سۇحباتىندا.
اناسىنىڭ سوزىنشە، ءلاززات اسانوۆانىڭ سۇيەگى جەلتوقسان وقيعاسىنىڭ تاعى ءبىر قۇربانى ەربول سىپاتاەۆتىڭ سۇيەگىمەن بىرگە ءبىر كۇندە جەتكىزىلگەن. رەسمي ورگاندار سول كەزدە ەربول سىپاتاەۆ «الاڭدا ماس كۇيىندە قايتىس بولدى»، ال ءلاززات اسانوۆا «5-قاباتتان قۇلاپ قازا تاپتى» دەگەن مالىمەت بەرگەن.
"قىزىمدى جەرلەگەنشە ەشكىم تارامادى. ەل مەنىڭ ءار ءسوزىمدى اڭدىپ وتىردى. «بايقاپ سويلەڭىز، ابايلاپ ايتىڭىز» دەپ ەسكەرتىپ وتىردى", – دەپ ەسكە العان التىناي اسانوۆا.
