تاۋەلسىزدىك كۇنى قارساڭىندا اباي وبلىسى اكىمىنىڭ قولداۋىمەن، ىشكى ساياسات باسقارماسىنىڭ ۇيىمداستىرۋىمەن جازۋشى، «قۇرمەت» وردەنىنىڭ يەگەرى، تولەگەن ايبەرگەنوۆ اتىنداعى سىيلىقتىڭ لاۋرەاتى ۇلاربەك دالەيۇلىنىڭ «جوشى حان» جانە «باتۋ حان» اتتى تاريحي روماندارىنىڭ تۇساۋكەسەرى ءوتتى.
رۋحاني ءىس-شاراعا ءوڭىردىڭ زيالى قاۋىم وكىلدەرى، عالىمدار، قالامگەرلەر، تاريحشىلار، جوعارى وقۋ ورىندارىنىڭ وقىتۋشىلارى مەن تاريح ماماندىعى بويىنشا ءبىلىم الىپ جاتقان ستۋدەنتتەر قاتىستى.
تۇساۋكەسەر ءراسىمىن اباي وبلىسى ىشكى ساياسات باسقارماسىنىڭ باسشىسى جارقىن ءجۇمادىلوۆ جۇرگىزدى.
– مەملەكەت باسشىسىنىڭ جارلىعىمەن قابىلدانعان ىشكى ساياساتتىڭ نەگىزگى قاعيداتتارىن، قۇندىلىقتارى مەن باعىتتارىن ءبىر جۇيەگە كەلتىرگەن تۇجىرىمدامالىق قۇجاتتا: «قازاقستاندىق پاتريوتيزم مەملەكەتكە، ونىڭ رامىزدەرى مەن ۇلتتىق مادەنيەتىنە قۇرمەتپەن قاراۋ، ەلىمىزدىڭ تاريحي جانە رۋحاني قۇندىلىقتارىن قادىرلەۋ، وتانىمىزدىڭ بۇگىنى مەن بولاشاعىنا جاۋاپكەرشىلىكپەن قاراۋ دەگەن ماعىنانى بىلدىرەدى»، – دەپ جازىلعان. تاۋەلسىزدىك مەرەكەسى قارساڭىندا ەل تاريحىنىڭ ەڭ كۇردەلى ءارى تاعدىرلى كەزەڭدەرىن ارقاۋ ەتكەن جوشى حان مەن باتۋ حان تۋرالى رومانداردىڭ تانىستىرىلۋى – ۇلتتىق رۋحتى نىعايتۋعا باعىتتالعان ماڭىزدى قادام. بۇل قوس كىتاپتى تاريحي سانانى جاڭعىرتۋ جولىنداعى باعا جەتپەس رۋحاني قازىنا دەۋگە بولادى. اتالعان تۋىندىلار تاريحي تۇلعالاردى كوركەمدىك پەن دەرەكتىلىك تۇرعىسىنان جاڭاشا پايىمداۋعا مۇمكىندىك بەرەدى، – دەدى باسقارما باسشىسى.
ءوز كەزەگىندە تاريحي رومانداردىڭ اۆتورى ۇلاربەك دالەيۇلى شىعارمالاردىڭ جازىلۋ ماقساتى مەن يدەيالىق ماڭىزىنا كەڭىنەن توقتالدى.
– اباي ەلىنە كەلۋ – مەن ءۇشىن ۇلكەن مارتەبە. تاۋەلسىزدىك مەرەكەسى قارساڭىندا وسىنداي قاسيەتتى وڭىردە وقىرماندارمەن جۇزدەسۋ – زور جاۋاپكەرشىلىك. بۇل كىتاپتار بەلگىلى ءبىر ماقساتپەن، تاريحقا دەگەن تەرەڭ قۇرمەتتەن تۋعان ەڭبەكتەر. رومانداردا جوشى حاننان كەيىن بيلىككە كەلگەن باتۋ حاننىڭ جاستىق شاعى، شىڭعىس قاعاننان باتا العان ءساتى، العاشقى جورىقتارى مەن كۇردەلى تاريحي تارتىستارعا تولى كەزەڭى كوركەم ءارى دەرەكتى نەگىزدە سۋرەتتەلەدى. ەڭبەك كەڭ وقىرمان اۋديتورياسىنا ارنالعان. العاشقى تيراجى 2 000 دانا بولىپ جارىق كورىپ، بۇگىندە وقىرماندار تاراپىنان جوعارى سۇرانىسقا يە بولىپ وتىر، – دەدى اۆتور.
تۇساۋكەسەر بارىسىندا ءسوز العان زيالى قاۋىم وكىلدەرى جاڭا تۋىندىلارعا جوعارى باعا بەرىپ، كىتاپتاردىڭ ۇلتتىق رۋحتى كۇشەيتۋدەگى، جاس ۇرپاقتىڭ تاريحي سانا-سەزىمىن قالىپتاستىرۋداعى ماڭىزىن اتاپ ءوتتى. قاتىسۋشىلار اۆتورعا سۇراقتار قويىپ، شىعارمالاردىڭ جازىلۋ تاريحى توڭىرەگىندە پىكىر الماستى.
ءىس-شارا سوڭىندا مارتەبەلى مەيمان ۇلاربەك دالەيۇلىنا اباي وبلىسى اكىمىنىڭ العىس حاتى تابىستالىپ، قازاقتىڭ داستۇرىنە ساي يىعىنا شاپان جابىلدى.
