قازاقستان پرەزيدەنتى قاسىم-جومارت توقاەۆ ترانسشەكارالىق سۋ ماسەلەلەرى مەن ارال، كاسپي تەڭىزدەرىنىڭ ەكولوگيالىق پروبلەمالارىنا نازار اۋداردى، دەپ حابارلايدى “ادىرنا”.
توقاەۆ ترانسشەكارالىق سۋدى پايدالانۋ جانە ارال مەن كاسپي تەڭىزدەرىندە قالىپتاسقان ەكولوگيالىق احۋالعا ەرەكشە ءمان بەرۋ قاجەتتىگىن اتاپ ءوتتى.
"سۋ تاپشىلىعى ۇلكەن پروبلەماعا اينالىپ وتىر. رەسۋرستى ساقتاۋ جانە ۇقىپتى پايدالانۋ – ەلىمىز ءۇشىن عانا ەمەس، ايماقتاعى باسقا مەملەكەتتەر ءۇشىن دە ستراتەگيالىق، ومىرلىك ماڭىزدى باسىمدىق. ترانسشەكارالىق سۋدى پايدالانۋ ماسەلەسىن، ارال جانە كاسپي تەڭىزدەرىنىڭ ەكولوگيالىق جاعدايىن كەشىكتىرمەي شەشۋ ءۇشىن ءتيىستى شارالار قاجەت. ءوزارا مامىلەگە نەگىزدەلگەن بىرلەسكەن ارەكەتتەر حالىقارالىق ارالدى قۇتقارۋ قورىنىڭ تيىمدىلىگىن ارتتىرا الادى. كاسپي تەڭىزىنىڭ تارتىلۋى ەكولوگيالىق، الەۋمەتتىك-ەكونوميكالىق جانە ساياسي سالدارعا اكەپ سوعۋى مۇمكىن. قازاقستان كاسپي ەكوجۇيەسىن ساقتاۋ مەن تەڭىزدىڭ تارتىلۋىن الدىن الۋ ماقساتىندا ارنايى مەملەكەتارالىق باعدارلاما ازىرلەۋ باستاماسىن كوتەردى", – دەدى پرەزيدەنت.
سونىمەن قاتار، مەملەكەت باسشىسى بۇۇ قۇرامىندا حالىقارالىق سۋ ۇيىمىن قۇرۋدى ۇسىندى.
"بۇۇ جۇيەسىندە تەك سۋ ماسەلەسىمەن اينالىساتىن ارناۋلى قۇرىلىم جوق. قازاقستان حالىقارالىق سۋ ۇيىمىن قۇرۋدى ۇسىنادى. بۇل باستاما ارقىلى بۇۇ اياسىنداعى ءتۇرلى ۇيىمداردىڭ مانداتىن ءبىر ماقساتقا جۇمىلدىرۋعا بولادى. UN-Water ۆەدومستۆوارالىق تەتىگىن تولىققاندى اگەنتتىككە نەمەسە ۇيىمعا اينالدىرۋ وڭتايلى شەشىم بولار ەدى. بۇل بۇۇ-نىڭ ورنىقتى دامۋ ماقساتتارىنا جانە حالىقارالىق قوعامداستىق مۇددەسىنە ساي كەلەدى. كەلەسى جىلى ساۋىردە استانادا وتەتىن ايماقتىق ەكولوگيالىق سامميتتە قازاقستان جاھاندىق سۋ ۇيىمىن قۇرۋ جونىندە حالىقارالىق كونسۋلتاتسيانى باستاماق", – دەدى توقاەۆ.
مەملەكەت باسشىسى فورۋم اياسىندا مۇددەلى ەلدەردىڭ جاسامپاز سەرىكتەستىگىن نىعايتۋعا جانە الەمدە ادىلەتتى ءتارتىپ ورناتۋعا باعىتتالعان حالىقارالىق كۇش-جىگەرگە جاڭا سەرپىن بەرىلەتىنىنە سەنىم ءبىلدىردى.
