بۇگىن شىمكەنت قالاسىنىڭ دوستىق ۇيىندە قازاقستان رەسپۋبليكاسىنىڭ تاۋەلسىزدىك كۇنىنە وراي قالالىق اسسامبلەيا جاستارىنىڭ ۇيىمداستىرۋىمەن «تاۋەلسىز ەلدىڭ بولاشاعى – جاستار» اتتى مەرەكەلىك كونتسەرتتىك باعدارلاما ءوتتى. ءىس-شاراعا شىمكەنت قالاسىنىڭ ىشكى ساياسات باسقارماسىنىڭ «قوعامدىق كەلىسىم» كمم باسشىسى نۇركەن الىمقۇلوۆ، قالالىق ەتنومادەني بىرلەستىكتەردىڭ توراعالارى مەن بەلسەندىلەرى، سونداي-اق قالا تۇرعىندارى قاتىستى.
كونتسەرتتىڭ نەگىزگى ماقساتى – جاستاردىڭ شىعارماشىلىق الەۋەتىن دارىپتەۋ، ۇلتتىق مادەني مۇرانى ناسيحاتتاۋ جانە ۇرپاق ساباقتاستىعىن نىعايتۋ. باعدارلاما شەڭبەرىندە جاستاردىڭ تاۋەلسىز ەلىمىزدىڭ دامۋىنا قوسقان ۇلەسى كورسەتىلىپ، ونەر ارقىلى پاتريوتتىق سەزىمدى قالىپتاستىرۋعا ەرەكشە نازار اۋدارىلدى.
ءىس-شارا «ۇرپاق ساباقتاستىعى – تاۋەلسىزدىك كەپىلى» اتتى پوەتيكالىق-حورەگرافيالىق كومپوزيتسيامەن اشىلدى. ساحنادا ستۋدەنت-جاستار ەلىمىزدىڭ وركەندەۋ جولى مەن جەتىستىكتەرىن بەينەلەدى، ال «شامسينۋر» بي ءانسامبلى «مەرەكە» ءبيىن ورىنداپ، كورەرمەندەرگە كوتەرىڭكى كوڭىل-كۇي سىيلادى.
شىمكەنت قالاسىنىڭ «قوعامدىق كەلىسىم» كمم باسشىسى نۇركەن الىمقۇلوۆ ءسوز سويلەپ «بۇگىنگى شارا – جاستارىمىزدىڭ شىعارماشىلىعىن كورسەتۋ مەن ۇرپاق ساباقتاستىعىن نىعايتۋعا ارنالعان ماڭىزدى ءىس-شارا. ءبىز جاستارعا سەنەمىز جانە ولاردىڭ تاۋەلسىز ەلىمىزدىڭ دامۋىنا قوسقان ۇلەسى زور دەپ سانايمىز. ءبىزدىڭ مىندەتىمىز – جاس بۋىنعا دۇرىس باعىت بەرۋ، ولاردىڭ شىعارماشىلىق قابىلەتىن دامىتىپ، پاتريوتتىق تاربيە بەرۋگە مۇمكىندىك جاساۋ. بۇل تەك مادەني ءىس-شارا ەمەس، سونىمەن قاتار، تاۋەلسىزدىكتىڭ ءمانىن ءتۇسىندىرۋ، جاستاردى ەلگە قىزمەت ەتۋگە باۋلۋ ماقساتىنداعى ماڭىزدى باستاما» – دەدى.
كونتسەرت بارىسىندا ءار ءتۇرلى جانر مەن باعىتتاعى شىعارمالار كورەرمەن نازارىنا ۇسىنىلدى. ءو.جانىبەكوۆ اتىنداعى وقمپۋ ستۋدەنتتەرى ء«سان» تەاترىنىڭ دەفيلە كورسەتىلىمىن وتكىزدى. سونىمەن قاتار، رەسپۋبليكالىق بايقاۋلاردىڭ لاۋرەاتى يزاتۋللاەۆا زارديانا ەكى ءان ورىنداسا، ۇركەر توبىنىڭ رەپەرتۋارىنان «جانىم» ءانىن رەسپۋبليكالىق بايقاۋلاردىڭ لاۋرەاتى ولەگ ۆيمەنكو جەتكىزدى.
ءىس-شارا فينالىندا «قازاقستان – ەلىم مەنىڭ» ءانى شىرقالىپ، ساحناداعى بارلىق ورىنداۋشىلار مەن جالاۋشالار كورەرمەندەرمەن بىرگە انگە قوسىلدى.
ايتا كەتەيىك، «اسسامبلەيا جاستارى» قوعامدىق بىرلەستىگىنىڭ نەگىزگى مىندەتى – قازاقستان حالقىنىڭ قوعامدىق كەلىسىمى مەن جالپىۇلتتىق بىرلىگى نەگىزىندە جاستاردى دامىتۋ جانە توپتاستىرۋ، قازاقستان حالقى اسسامبلەياسى قىزمەتى اياسىندا جاستار باستامالارىن قولداۋ جانە الەۋمەتتىك بەلسەندىلىگىن دامىتۋ، مادەني-اعارتۋشىلىق قىزمەتتى جۇزەگە اسىرۋ، جاستار اراسىندا قوعامدىق كەلىسىمدى قالىپتاستىرۋعا جاردەمدەسۋ، جاستاردىڭ دەموكراتيالىق نورمالارعا سۇيەنەتىن ساياسي-قۇقىقتىق مادەنيەتىن قالىپتاستىرۋ، ەتنوس جاستارىن مەملەكەتتىك ءتىلدى ۇيرەنۋگە، ونى تانىمال ەتۋ جانە ەتنوسارالىق قاتىناس ءتىلى رەتىندە ىلگەرىلەتۋ پروتسەسىنە تارتۋ، پاتريوتتىق باعىتتاعى قوعامدىق-ساياسي ءىس-شارالاردى، ەتنوسارالىق جانە مادەنيەتارالىق ديالوگتى وتكىزۋگە ەتنومادەني جانە وزگە دە بىرلەستىكتەردىڭ جاستارىن تارتۋ، جاستار اراسىندا ۆولونتەرلىك پەن قايىرىمدىلىق قىزمەتتى دامىتۋعا قولداۋ كورسەتۋ.
