رەسپۋبليكا كۇنى قارساڭىندا شەت اۋدانىنىڭ ساكەن سەيفۋللين اتىنداعى كەنتىندە تۇرعىندار ءۇشىن قۋانىشتى وقيعا بولدى، مۇندا «كەلەشەك مەكتەبى» ۇلتتىق جوباسى اياسىندا 300 ورىندىق جاڭا مەكتەپ پايدالانۋعا بەرىلدى، دەپ حابارلايدى.
جاڭا ءبىلىم ورداسى وقۋشىلاردىڭ جان-جاقتى دامۋى مەن ساپالى ءبىلىم الۋىنا بارلىق جاعداي جاسالعان زاماناۋي ءبىلىم كەڭىستىگىنە اينالدى. كەڭ ءارى جارىق كابينەتتەر ەرگونوميكالىق جيھازبەن جابدىقتالعان. مۇندا اسحانا، كىتاپحانا، اكت جانە سپورت زالدارى، سونداي-اق STEM-زەرتحانا، جاراتىلىستانۋ-ماتەماتيكالىق باعىتتاعى سىنىپتار، روبوتوتەحنيكا مەن گرافيكالىق ديزاين كابينەتتەرى جۇمىس ىستەيدى. وقۋشىلاردىڭ شىعارماشىلىق قابىلەتىن دامىتۋعا ارنالعان ۇيىرمەلەرگە ارنايى بولمەلەر دە بار.
ءبىلىم مەكەمەسىنە جاساندى ينتەللەكت تەحنولوگياسىمەن جابدىقتالعان 22 ينتەراكتيۆتى تاقتا ورناتىلعان. سونىمەن قاتار، مەكتەپتىڭ قاۋىپسىزدىك جۇيەسى زاماناۋي تالاپتارعا ساي: بەينەباقىلاۋ كامەرالارى جانە پوليتسيامەن تىكەلەي بايلانىس ورناتۋعا ارنالعان دابىل تۇيمەلەرى بار.
سالتاناتتى اشىلۋ راسىمىندە وبلىس اكىمى ەرماعانبەت بولەكپاەۆ قۇتتىقتاۋ ءسوز سويلەپ، جاڭا مەكتەپتىڭ اشىلۋى ءوڭىردىڭ ءبىلىم بەرۋ سالاسىنداعى ماڭىزدى قادام ەكەنىن اتاپ ءوتتى:
قىمباتتى بالالار! بۇل مەكتەپ سىزدەردىڭ ارماندارىڭىزدىڭ باستاۋىنا اينالسىن. رەسپۋبليكا كۇنىمەن جانە جاڭا مەكتەپتىڭ اشىلۋىمەن شىن جۇرەكتەن قۇتتىقتايمىن! – دەدى ول.
مەكتەپتىڭ تاعى ءبىر ەرەكشەلىگى - باستاۋىش جانە جوعارى سىنىپتارعا ارنالعان بولەك بلوكتاردىڭ بولۋى. ەرەكشە ءبىلىم بەرۋدى قاجەت ەتەتىن بالالار ءۇشىن دە جاعداي جاسالعان: ءبىرىنشى جانە ەكىنشى قاباتتى بايلانىستىراتىن ليفت ورناتىلعان.
ساكەن سەيفۋللين اتىنداعى تىرەك مەكتەبىنىڭ (رەسۋرستىق ورتالىقتىڭ) ديرەكتورى الما ابەۋوۆا جاڭا وقۋ ورداسىنىڭ اشىلۋى ءبىلىم ساپاسىن ارتتىرۋعا زور مۇمكىندىك بەرەتىنىن ايتتى:
ەندى مەكتەبىمىز بارلىق زاماناۋي ءبىلىم ستاندارتتارىنا تولىق سايكەس كەلەدى. پەداگوگيكالىق قۇرام تولىق جاساقتالعان، – دەدى ول.
ايتا كەتەيىك، شەت اۋدانىنىڭ اقسۋ-ايۋلى اۋىلىندا دا «كەلەشەك مەكتەبى» جوباسى بويىنشا جاڭا مەكتەپتىڭ قۇرىلىسى ءجۇرىپ جاتىر. سوڭعى ەكى جىلدا قاراعاندى وبلىسىندا جەتى جاڭا مەكتەپ سالىنعان، ولاردىڭ تورتەۋى ءدال وسى ۇلتتىق باعدارلاما اياسىندا ىسكە اسىرىلعان.
