«بايان سۇلۋ» كومپانياسى رەسەيدەگى جالعىز فيليالىن جابادى. ءبولىم چەليابى قالاسىندا ورنالاسقان. بۇل جايلى قازاقستان قور بيرجاسىندا جاريالانعان حابارلامادا جازىلعان، دەپ حابارلايدى "ادىرنا".
بۇل شەشىمدى «بايان سۇلۋ» كومپانياسىنىڭ ديرەكتورلار كەڭەسى 1 شىلدەدە قابىلداعان، الايدا ونىڭ سەبەبى بەلگىسىز. 2024 جىلدىڭ قاراشاسىندا كومپانيا الماتىداعى فيليالىنىڭ جابىلعانىن حابارلاعان.
“قازىرگى ۋاقىتتا رەسەي نارىعىنا ءونىم جەتكىزۋ تىكەلەي ساتۋ مودەلى ارقىلى جۇزەگە اسىرىلادى، بۇل جەكە فيليال ۇستاۋدى ارتىق ەتەدى. سونىمەن بىرگە، «بايان سۇلۋ» اق رەسەي نارىعىندا بەلسەندى جۇمىسىن جالعاستىرىپ جاتىر، ەلىمىزدەن رەسەيگە ەكسپورتتالاتىن ءونىم كولەمى جالپى ەكسپورت كولەمىنىڭ 40%-دان استامىن قۇرايدى. جەتكىزىلىمدەر قولدانىستاعى لوگيستيكالىق ارنالار ارقىلى جانە كەلىسىمشارتتىق مىندەتتەمەلەرگە تولىق ساي جۇزەگە اسىرىلۋدا”، — دەلىنگەن كومپانيانىڭ رەسمي مالىمدەمەسىندە.
وتكەن جىلداعى قارجى ەسەبىنە سۇيەنسەك، جالپى كومپانيانىڭ ءۇش فيليالى بولدى. قازىر ونىڭ ەكەۋى الماتى جانە قوستانايدا جۇمىس ىستەيدى. فيليالدار – كومپانيانىڭ
وتكەن جىلدىڭ قورىتىندىسى بويىنشا, «بايان سۇلۋ» كومپانياسى تازا پايداسىن 23,1%-عا ارتتىرىپ، 3,45 ملرد تەڭگەگە جەتكىزدى. الايدا كومپانيانىڭ نەگىزگى نارىعى – قازاقستانداعى ساتىلىمى 9,2%-عا ازايىپ، 41,5 ملرد تەڭگەنى قۇراعان. ال فابريكا ءۇشىن ماڭىزدىلىعى جاعىنان ەكىنشى ورىندا تۇرعان نارىق، رەسەيدەگى ساتىلىمدار ەكى ەسەگە ارتىپ، 2024 جىلى 2,9 ملرد تەڭگەنى قۇرادى.
«بايان سۇلۋ» كومپانياسىنىڭ نەگىزگى اكتسيونەرى – KazFoodProducts, ونىڭ ۇلەسى 85,06%. ال كومپانيانىڭ تۇپكى يەسى – كاسىپكەر ەرلان بايمۇراتوۆ, Forbes جۋرنالى 2024 جىلعى مامىردا ونىڭ بايلىعىن 108 ملن دوللارعا باعالادى. 2024 جىلعى قازاندا «كۋرسيۆ» جازعانداي، كومپانيانىڭ 5% اكتسياسىن مەملەكەتتىك الەۋمەتتىك-كاسىپكەرلىك كورپوراتسيا – «توبىل» ساتىپ العان. تاعى 5% اكتسيا كومپانيا باسقارما توراعاسى تيمۋر سادىقوۆقا تيەسىلى.