بۇگىندە اقتوبە وبلىسى بويىنشا جاسوتاندىقتاردىڭ قاتارىندا 2000-عا جۋىق جاس بار. جاستار قاناتىنىڭ قاتارىنداعى بەلسەندى جاستاردىڭ دەنى — قالاداعى جوعارى وقۋ ورىندارى مەن كوللەدج ستۋدەنتتەرى. بيىل پارتيا جۇمىسىن العا جىلجىتۋدا ءدال وسى جاسوتاندىقتار مەن وڭىرلىك كەڭەس كوپ جۇمىس اتقاردى. بۇل جاستار — جاۋاپكەرشىلىكتىڭ جۇگىن كوتەرىپ، ەل دامۋى جولىندا ۇزدىكسىز جۇمىس ىستەپ جۇرگەن جاندار.
قازىرگى تاڭدا وڭىردەگى ءار اۋداندا «AMANAT» پارتياسىنىڭ فيليالى جانىنداعى جاستار قاناتى جۇمىس ىستەيدى. وسى فيليال جاستارىنىڭ قاتىسۋىمەن، «Jas Otan» جق اقتوبە وبلىستىق فيليالىنىڭ ۇيىمداستىرۋىمەن بيىل جىل باسىنان بەرى 60-تان استام ءىس-شارا ءوتتى. ماسەلەن، جاستاردى وتانسۇيگىشتىككە تاربيەلەۋ باعىتىنداعى «QAISAR» اسكەري پاتريوتتىق جوباسى اياسىندا مەكتەپتىڭ جوعارى كلاسس وقۋشىلارى مەن كوللەدج ستۋدەنتتەرىن اقتوبە قالاسىنداعى اسكەري بولىمدەردەگى ساربازداردىڭ ومىرلەرىمەن تانىستىردى. «ەرلىك ساعاتى» اتاۋىمەن قر ۇلتتىق ۇلاننىڭ №6655 ءبولىمىنىڭ 1-ءشى زەنيتتىك ۆزۆود كومانديرى، لەيتەنات ۇلان مىرزابايدى جاستارمەن كەزدەستىردى. اتالعان جوبانىڭ اياسىندا مەكتەپتەردىڭ جوعارى سىنىپ وقۋشىلارى اراسىندا اسكەري پاتريوتتىق ويىندار ۇيىمداستىرىلىپ، وڭىردەگى ىرىكتەۋ كەزەڭىنەن جەڭىسكە جەتكەن كوماندا نۇر-سۇلتان قالاسىندا وتكەن رەسپۋبليكالىق جارىسقا قاتىستى.
كوكتەمگى سۋ تاسقىنى سالدارىنان زارداپ شەككەن وتباسىلارعا كومەك كورسەتۋ ءۇشىن ەرىكتىلەر شتابىن قۇرىپ، قيىن جاعدايدا قالعان وتباسىلارعا كومەككە قول سوزدى. سونداي-اق ۇلىستىڭ ۇلى كۇنىن جاستار اراسىندا اۋقىمدى تۇردە تويلاۋعا باستاما كوتەرىپ، قالاداعى ورتالىق ستاديون ماڭىنداعى اربات الاڭىندا «جاستار اۋىلى» اتاۋىمەن ۇلىستىڭ ۇلى كۇنىن تويلادى. وبلىستىق جاستار رەسۋرستىق ورتالىعىمەن جانە اقتوبەلىك بەلسەندى جاستاردىڭ باسى قوسىلىپ، تويلانعان ۇلىستىڭ ۇلى كۇنى مەرەكەسىندە قازاق حالقىنىڭ ۇلتتىق قۇندىلىقتارى مەيلىنشە ناسيحاتتالدى.
— «يگى ىستەر» قايىرىمدىلىق اكتسياسى اياسىندا وبلىستىق «نۇر عاسىر» مەشىتىمەن، «اڭسار» اقپاراتتىق تالداۋ ورتالىعىمەن، وبلىستىق جاستار رەسۋرستىق ورتالىعىمەن بىرلەسىپ 120 وتباسىعا ازىق-تۇلىك سەبەتتەرىن جەتكىزىپ بەردىك. وسى اكتسيانىڭ اياسىندا ءبىر كۇندىك تەگىن تاكسي قىزمەتى ۇيىمداستىرىلدى. سونداي-اق جاسوتاندىقتار «ءۇمىت» بالالار ۇيىندەگى تاربيەنۋشىلەرگە ەرەكشە كوڭىل كۇي سىيلاپ، ولارعا سىيلىقتار تاراتتى، — دەيدى «Jas Otan» جق اقتوبە وبلىستىق فيليالىنىڭ توراعاسى انۋار يسكارين.
ونىڭ ايتۋىنشا، جىل باسىنان بەرى ستۋدەنتتەرگە ارنالعان جاتاقحانالاردىڭ الەۋمەتتىك تۇرمىستىق جاعدايلارىنا مونيتورينگ جۇرگىزىپ كەلەدى. سونىڭ ارقاسىندا وبلىستا جاتاقحانالار ماسەلەسى شەشىلۋدە. سونداي-اق بيىل قالا جاستارى «تازا like» پارتيالىق جوباسى اياسىندا سەنبىلىك جۇمىستارىنا جانە اعاش كوشەتتەرىن وتىرعىزۋ شارالارىنا بەلسەنە اتسالىستى. جىلداعى ءۇردىس بويىنشا ۇلى جەڭىس مەرەكەسى قارساڭىندا جاسوتاندىقتار قالاداعى باتىرلار قۇرمەتىنە ورناتىلعان ەسكەرتكىشتەرگە دە تازالىق جۇمىستارىن جۇرگىزدى.
— «AMANAT» پارتياسىنىڭ كۋبوگىنە ارنالعان حح رەسپۋبليكالىق پىكىرسايىس ءتۋرنيرىنىڭ وبلىستىق ىرىكتەۋ كەزەڭىن وتكىزىپ، ءوڭىر نامىسىن قورعاۋ ءۇشىن رەسۋپبليكالىق تۋرنيرگە كوماندا جولدادى. ناتيجەسىندە اقتوبە وبلىسى اتىنان قاتىسقان «اپو» دەبات كومانداسى جۇلدەلى ءىى ورىندى يەلەنىپ قايتتى، — دەيدى ول.
قازىرگى تاڭدا اۋدان جانە اۋىل جاستارىمەن بايلانىس ورناتۋ ماقساتىندا «Jas Otan» جاستار قاناتى جاڭا جوبا ازىرلەپ جاتىر. جوبانىڭ اتاۋى – «ورلەۋ». بۇل جوبا اياسىندا ارنايى مەنتورلار اۋىل جاستارىمەن بايلانىس ورناتىپ، ولاردى جان-جاقتى قولداۋ ماقساتىندا ەلدى مەكەندەردى ارالايتىن بولادى. قازىرگى تاڭدا اتالعان جوبانىڭ تۇجىرىمداماسى بەكىتىلىپ جاتىر.
— جاستارعا ءوز ماسەلەلەرىن مىنبەرگە شىعىپ كوتەرۋلەرىنە، ونىڭ شەشىلۋىن باقىلاۋعا مۇمكىندىكتەر بەرىلىپ وتىر. «AMANAT» پارتياسى بۇل ءىستى وتكەن جىلى سايلاۋ ناۋقانى اياقتالىسىمەن قولعا العان بولاتىن. پارتيا ءار سالا بويىنشا قۇرعان قوعامدىق كەڭەستەردىڭ قاتارىندا جاستاردى قولداۋ جونىندەگى كەڭەسىنىڭ قۇرىلۋىنا اسا ءمان بەردى. بۇگىندە بۇل كەڭەس مەملەكەتتىك جاستار ساياساتى ماسەلەلەرى جونىندەگى زاڭنامانى جەتىلدىرۋگە، جاستاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋگە ىقپال ەتىپ، جاستارعا باعىتتالعان مەملەكەتتىك باعدارلامالار مەن جوبالاردىڭ ىسكە اسىرىلۋ تيىمدىلىگىنە تالداۋ جۇرگىزىپ، جاستار ساياساتى سالاسىنا قاتىستى وزگە دە ماسەلەلەردى تالقىلايدى، — دەيدى انۋار يسكارين.
ال «AMANAT» پارتياسى اقتوبە وبلىستىق فيليالى جانىنداعى جاستاردى قولداۋ جونىندەگى ايماقتىق قوعامدىق كەڭەستىڭ توراعاسى باقىت مولداگەرەەۆانىڭ ايتۋىنشا، وتكەن جىلى كەڭەستىڭ بىرقاتار وتىرىستارىندا ءوڭىر جاستارىنا قاتىستى ماسەلەلەر قارالىپ، جاستاردىڭ يگىلىگى ءۇشىن ورىندالۋعا ءتيىس مىندەتتەردى باقىلاۋعا الدى. ناتيجەسىندە، پارتيانىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى مەن «جاستار – وتانعا!» باعدارلاماسىن ءتيىمدى ىسكە اسىرۋ ماقساتىندا ازىرەنگەن ايماقتىڭ جول كارتاسىنداعى مەجەلەنگەن مىندەتتەر ۋاقىتىندا ءارى تولىق ورىندالدى.
— بيىلعى جىل باستالعاننان بەرى اتالعان كەڭەستىڭ ەكى وتىرىسى ءوتتى. قۇرامىندا 15 مۇشەسى بار ايماقتىق كەڭەس بۇل جولى جاستار اراسىنداعى قىلمىستى ازايتۋ بويىنشا قابىلدانىپ جاتقان كەشەندى شارالار جانە 14-29 جاسقا دەيىنگى 80 مىڭنان استام جاستاردى قامتي وتىرىپ، قۇقىق بۇزۋشىلىقتارعا نولدىك توزىمدىلىكتى قالىپتاستىرۋ جونىندەگى جوبالاردى ىسكە اسىرۋ جولىمەن جاستار اراسىنداعى قۇقىق بۇزۋشىلىق دەڭگەيىن تومەندەتۋ، جاستاردىڭ دەنساۋلىعىن جاقسارتۋ بويىنشا قابىلدانىپ جاتقان كەشەندى شارالار،14-29 جاستاعى ايەلدەر اراسىندا تۇسىك جاساتۋدى ازايتۋ، س.بايىشەۆ اتىنداعى ۋنيۆەرسيتەت جانىنداعى جاتاقحانانىڭ قۇرىلىسى، ءۇش اۋىسىمدى مەكتەپتەر سانىن ازايتۋ، ون التى مەكتەپتىڭ قۇرىلىسى، جۇمىس ىستەيتىن جاستار ءۇشىن جالعا بەرىلەتىن تۇرعىن ءۇي مەملەكەتتىك باعدارلاماسىن ىسكە اسىرۋ بارىسى جانە جاس وتباسىلاردىڭ تۇرعىن ءۇي پروبلەمالارىن شەشۋ جونىندەگى وڭىرلىك باعدارلامالاردى قۇرۋ ماسەلەلەرىن قارادى، — دەيدى ب.مولداگەرەەۆا.
ونىڭ ايتۋىنشا، جاستاردى قولداۋ جونىندەگى ايماقتىق قوعامدىق كەڭەستىڭ جىلدىق ءىس-شارالار جوسپارىنا سايكەس، كەڭەستىڭ وتىرىسى اي سايىن ءوتىپ، وندا جاستارعا قاتىستى ماسەلەلەر قارالاتىن بولادى. ودان بولەك، اقتوبە ءوڭىرى بويىنشا NEET ساناتىنداعى جاستاردىڭ دەرەكتەر بازاسىن قۇرۋ، اۋىل جاستارىمەن كەزدەسۋ، كەمىندە 20 ستۋدەنتتىك جاتاقحانانىڭ الەۋمەتتىك-تۇرمىستىق جاعدايلارىن مونيتورينگىلەۋ، 14 جاستان 29 جاسقا دەيىنگى 80 مىڭنان استام جاستاردى قامتي وتىرىپ، قۇقىق بۇزۋشىلىقتارعا نولدىك توزىمدىلىكتى قالىپتاستىرۋ جونىندەگى جوبالاردى ىسكە اسىرۋ جولىمەن جاستار اراسىنداعى قۇقىق بۇزۋشىلىق دەڭگەيىن تومەندەتۋ سىندى وزگە دە ماسەلەلەر توڭىرەگىندە مىندەتتەر مەجەلەنىپ وتىر.
داناگۇل بايمۇقاش،
"ادىرنا" ۇلتتىق پورتالى.
