بۇگىن اقتوبە وبلىسىندا 517 رەفەرەندۋم ۋچاسكەسى جۇمىس ىستەپ جاتىر. بۇل ۋچاسكەلەردە تۇرعىنداردىڭ ناۋقانعا قاتىسۋى ءۇشىن جاعداي جاسالعان. ءتىپتى مۇمكىندىگى شەكتەۋلى جاندار ءۇشىن ينۆاتاكسيلەر مەن سۋردو اۋدارماشىلاردىڭ جۇمىس جاساۋى قاراستىرىلعان. داۋىس بەرۋ ناۋقانىندا جاستاردىڭ بەلسەندىلىگى بايقالادى. اسىرەسە، تاڭداۋ جاساۋعا كەلگەن ستۋدەنتتەردىڭ قاراسى كوپ. سونداي-اق ەل بولاشاعى ءۇشىن ماڭىزدى شارادان قالماۋعا تىرىسقان قاريالارىمىز دا بار.
زەينەتكەر قاسىمبەك ءابدىراحمانوۆ اقتوبە قالاسىنداعى #67 داۋىس بەرۋ ۋچاسكەسىنە تاڭعى ساعات 08.15-تە كەلدى. ول مەملەكەتتىڭ رەفورمالارىن قولدايتىنىن، وڭ وزگەرىستەردىڭ جاقسىلىققا باستايتىنىن ايتادى.
- وتباسىمىزبەن كەلىپ، داۋىس بەرىپ جاتىرمىز. پرەزيدەنتتىڭ باستامالارى دۇرىس دەپ ەسەپتەيمىن. ەل يگىلىگىنە قىزمەت ەتىپ جۇرگەن ازاماتتارىمىز، جاستارىمىز امان بولسىن! قازاقستانىمىز دامي بەرسىن! - دەيدى ول.
اقتوبە قالاسىنداعى #538 رەفەرەندۋم ۋچاسكەسىنە كەلىپ داۋىس بەرگەن اياۋلىم ساعيدوللاقىزى بۇگىن، 5 ماۋسىمدا، 18 جاسقا تولىپ وتىر. تۋعان كۇنىندە العاش بولىپ رەفەرەندۋمعا قاتىسىپ، داۋىس بەرگەن اياۋلىم ەلدە بولىپ جاتقان وزگەرىستەردى قولدايتىنىن جەتكىزدى.
— مەديتسينالىق كوللەدجدە وقيمىن. ەلىمىزدە بولىپ جاتقان رەفورمالاردى قولدايمىن. قاسىم-جومارت كەمەلۇلىنىڭ باستاماسىمەن مەملەكەتىمىزدە وڭ وزگەرىستەر، جاقسى جاڭالىقتار بولىپ جاتىر. بۇگىن 18 جاسقا تولىپ، العاش رەت رەفەرەندۋمعا قاتىسۋ مەن ءۇشىن كۇتپەگەن جاعداي بولدى، — دەيدى ول.
ايتا كەتۋ كەرەك، داۋىس بەرۋ ۋچاسكەلەرى كەشكى 20.00-گە دەيىن جۇمىس ىستەيدى. جالپى اقتوبەلىكتەردىڭ بەلسەندىلىگى دە، كوڭىل كۇيى دە جاقسى.
قورىتا ايتساق، اقتوبە وبلىسى بۇل رەفەرەندۋمنان جاڭا، جاعىمدى وزگەرىستەر كۇتەدى.
داناگۇل بايمۇقاش،
"ادىرنا" ۇلتتىق پورتالى.
