Áleýmettik mańyzy bar azyq-túlik taýarlarynyń baǵasyn turaqtandyrý maqsatynda Almaty oblysynyń ákimdigi, oblystyq bıýdjetten 3 mlrd. teńge qarajat bólgen, onyń ishinde turaqtandyrý qoryn qalyptastyrýǵa – 700 mln. teńge jáne jeńildik nesıe berý úshin – 2,3 mlrd. teńge qarastyrylǵan. Bul týraly «Jetisy Media» aqparattyq alańynda ótken baspasóz-máslıhatynda málim boldy.
Jetisý ólkesinde 19 áleýmettik mańyzy bar azyq-túlik taýarlarynyń 80% óndiriledi. Sol sebepten Turaqtandyrý qoryna satyp alynatyn azyq-túlik taýarlarynyń 90% Almaty oblysynyń taýar óndirýshilerinen alynady.
Ótken jyldan bastap oblystyń turaqtandyrý qoryna 1 mlrd. 227 mln. teńge somasyna 8 743 tonna kóleminde azyq-túlik satyp alyndy. Aımaqtaǵy turaqtandyrý qoryndaǵy ónimge suranys arttqan. Nátıjesinde 7 400 tonna ónim satylǵan. Ótkizilgen azyq-túliktiń basym bóligi 1-surypty bınaı uny bolyp otyr.
Almaty oblysynda negizinen 55 naýbaıhana jumys jasaıdy. Atalǵan kásiporyndar óńirdegi as atasynyń baǵasyn ósirmeý úshin, arzandatylǵan baǵadaǵy unmen qamtamasyz etilgen. Qabyldanǵan sharalardyń arqasynda 2019 jyldyń qarashasynan bastap jáne 2020 jyldyń ishinde naýbaıhanadan naryqqa jóneltiletin nannyń baǵasy bir bólke úshin 85 teńgeden aspady.
Aıta keteıik, turaqtandyrý qorynan áleýmettik mańyzy bar azyq-túlik taýarlary naryqtaǵy baǵammen salystyrǵanda 10-15% tómen baǵamen satylady.
«Búgingi kúnge turaqtandyrý qorynda 1 278 tonna ónim bar. Atalǵan taýarlar, Taldyqorǵan qalasyndaǵy kommýnaldyq bazarda tómen baǵada satylymǵa shyǵady. Oblystyń turaqtandyrý qorynan Aqsý qant zaýyty óndirgen qum-shekerdi kelisi 207 teńgeden, Balqash aýdanynyń kúrish ósiretin qojalyqtarynan satyp alynǵan kúrishti 210 teńgeden, Qapshaǵaı qalasynda «Mareven Fýd Tıan-Shan» kásiporyny óndirgen makarondy 185 teńgeden, Eskeldi aýdanynyń aýyl sharýashylyǵy taýar óndirýshileriniń kartop ónimin 80 teńgege, al pııazdyń kelisin 70 teńgeden satyp alýǵa bolady»,-deıdi Jetisý áleýmettik-kásipkerlik korporaııasy basqarma tóraǵasynyń orynbasary Almıra Ibraımova.
Memleket basshysynyń bastamasy boıynsha agrarlyq ónimniń turaqty satyp alyný jáne ótkizý júıesin jolǵa qoıý, sondaı-aq ÁMAT baǵasyn kóterilmeýi úshin 2020 jyly «Egistikten sórege deıin» baǵdarlamasy bastaý alǵan bolatyn. Bul maqsatqa respýblıkalyq bıýdjetten 1 mlrd. teńge bólindi.
Pılottyq joba aıasynda, qant óndirisi úshin tátti túbirdi ósiretin sharýa qojalyqtaryna, aǵartylǵan kúrish óndirýshilerine, sút, jumyrtqa jáne kókónis ónimderin óndirýshilerge jeńildetilgen nesıe berilip, kásipkerlerdiń taýarlary oblystaǵy saýda oryndaryndaǵy sórege ornalastyrylǵan bolatyn.
Úkimettiń tarapynan berilgen nesıe sharýalardyń isiniń alǵa basýyna óz septigin tıgizip keledi. Sáıkesinshe, fermerler men óndirýshiler tarapynan jeńildetilgen nesıe alýǵa suranys artqan. Atalǵan mehanızm boıynsha jumys jalǵaspaq.
