2025 jylǵy 4-14 sáýir aralyǵynda Serbııanyń Zlatıbor qalasynda mektep oqýshylaryna arnalǵan dástúrli ISF U15 sport festıvali ótti. Aýqymdy dodaǵa álemniń 55 elinen 2 500-den astam jas sportshy jınaldy. Túrli sport túrleri boıynsha ózara baq synasqan jas sportshylar arasynan otandastarymyz top jardy, dep habarlaıdy «Adyrna» ulttyq portaly.
Qazaqstan atynan jarysqa 22 sportshy qatysyp, boks, erkin kúres, dzıýdo jáne shahmat sekildi sport túrlerinde el namysyn abyroımen qorǵady. Solardyń 12-si – Tımýr Qulybaevtyń bastamasymen jáne «Halyk» qaıyrymdylyq qorynyń qoldaýymen júzege asyrylyp jatqan Auyl Sport jobasynyń jeńimpazdary bolatyn.
SERBIIa TÓRINDEGI JARQYN JEŃIS
Gımnazıadanyń qorytyndysy boıynsha, Qazaqstan quramasy jalpy esepte 11 medal ıelendi. Onyń ishinde Auyl Sport sportshylary tórt birdeı júldeni qanjyǵalaryna baılap, el abyroıyn asqaqtatty.
Atap aıtqanda, bokstan ótken tartysty básekede 19 elden kelgen 160 sportshynyń ishinen 52 keli salmaqta Shyńǵys Makarov, 60 kelide Aıbek Sadyq, jáne 57 kelide Nurtas Álimbaı qarsylastaryn qapy qaldyryp, altyn medalǵa qol jetkizdi. Bul úsh sportshy da 2024 jylǵy Auyl Sport jobasynyń úzdikteri ekenin atap ótken jón.
Búgin, 15 sáýir kúni Almatydaǵy Qazaq sport jáne týrızm akademııasy ǵımaratynda júldemen oralǵan sportshylardy jáne olardyń jattyqtyrýshylaryn marapattaý rásimi ótti. Is-sharaǵa Halyk qorynyń atqarýshy dırektory Ǵalymbek Jaqsylyqov, boksshy, halyqaralyq sport sheberi, Sıdneı Olımpıadasynyń jeńimpazy Ermahan Ybyraıymov, Qazaq sport jáne týrızm akademııasynyń tárbıe jáne sport jumysy jónindegi prorektory Muhtar Esqalıev jáne ózge de sport janashyrlary qatysty.
«Auyl Sport jobasy aýyldaǵy talantty balalarǵa úlken arenaǵa shyǵýǵa jol ashyp otyr. Bul – jaı ǵana sporttyq joba emes, naǵyz áleýmettik lıft, aýyl balasynyń armanyn aqıqatqa aınaldyratyn múmkindik. Gımnazıadadaǵy jetistikter – osy maqsattyń oryndalǵanyna dálel», deıdi Halyk qorynyń atqarýshy dırektory Ǵalymbek Jaqsylyqov.
Erkin kúresten Túrkistan oblysynyń týmasy Nurqoja Qalybek qola medal ıelendi. Rapıd jáne blı formatynda ótken shahmat saıysyna 17 elden 100-den astam shahmatshy qatysty. Aqyl oı dodasynda Auyl Sport jobasynyń ókilderi – Janat Nurym men Oltınaı Alǵapparova joǵary deńgeıdegi oıyn kórsetip, uıymdastyrýshylar tarapynan arnaıy marapattarǵa ıe boldy.
SPORTShYLAR LEBIZI
Bokstan 60 keli salmaqta úzdik atanǵan Aqmola oblysynyń 14 jastaǵy jas sportshysy Aıbek Sadyq jarys jaıly óz oıyn bólisti. Jartylaı fınalda sol qolynan jaraqat alǵan Aıbek bir qolymen ǵana judyryqtassa da, qarsylasyn san soqtyrdy.
«Bokspen aınalysqanyma tórt jyldan asa ýaqyt boldy. «Auyl Sport» jobasyna óńirlik jáne respýblıkalyq kezeńderden ótip keldim. Bapkerlerge, joba uıymdastyrýshylaryna jáne barlyq qoldaý bildirgen jaqyndaryma altynmen kelemin dep ýáde bergen bolatynmyn. Sol ýádemde oryndadym. Qýanyshtymyn. Jas sportshylardy, ásirese aýyldan shyqqan daryndardy qoldap otyrǵan «Auyl Sport» jobasyna alǵysym sheksiz. Naǵyz chempıondar – aýylda! Buıyrsa men de Olımpıada chempıony bolyp, kók týymyzdy bıikte jelbiretýdi maqsat tutamyn» dedi Aıbek Sadyq.
Balalarynyń jarqyn jetistigine kýá bolǵan ata-analar da qýanyshyn jasyrmady. Shahmattan baq synaǵan Oltınaı Alǵapparovanyń ákesi Ánýar Abdıev te joba jetekshilerine alǵysyn bildirdi.
«Bul biz estimegen, kútpegen dúnıe. Qarapaıym aýyldan shyqqan jas talanttardy shetelge aparyp, el namysyn qorǵaýǵa múmkindik berip otyrǵan «Halyk» qaıyrymdylyq qoryna raqmet aıtamyz. Balalarymyzdyń ár jetistigine shynaıy qýanyp, ár jarysty taqymymyzdy qysyp, tilektes bolyp otyramyz. Balamyzdyń jetistigin kórý, onyń úlken tájirıbe alyp, el kórip, jer kórip kelgenine biz ata-ana retinde shynaıy qýanyshtymyz» dedi ol.
MYŃDAǴAN AÝYL BALASYNA MÚMKINDIK BERGEN JOBA
Auyl Sport jobasynyń negizgi maqsaty – aýyl balalary men jasóspirimderin sportqa tartý, sportty nasıhattaý, buqaralyq sportty damytý, jattyqtyrýshylardyń biliktiligin arttyryp, olardy jańa daǵdylarǵa beıimdeý. 2024 jyly elge tanystyrylyp óńirlerden jas daryndardy jınaqtaǵan joba búginde jarty jyl ishinde óz nátıjesin berdi. Serbııa elindegi jarysta el namysyn abyroımen qorǵap, halyqaralyq arenadan júldemen oralǵan aýyl sportshylary da eleýsiz qalmady. Jas chempıondar meenat Tımýr Qulybaevtyń atynan alǵys hattarmen qatar, aqshalaı syıaqylarmen marapattaldy.
Atap aıtqanda altyn medal ıegerlerine – 1 mıllıon teńgeden, qola júldegerge – 300 myń teńge, shahmattan joǵary nátıje kórsetken jas zııatkerlerge – 200 myń teńgeden tabystaldy. Chempıondardy jattyqtyrǵan bapkerler de laıyqty túrde aqshalaı syılyqpen baǵalandy.
Aıta keteıik, byltyr ǵana tusaýy kesilgen Auyl Sport jobasy arqyly – 200-den astam eldi mekennen 12 000 jas sportshy óńirlik týrnırlerge qatysyp, 17 oblystan iriktelgen 1 300 úzdik jasóspirim fınaldyq kezeńde baq synady. Qazir joba aıasynda boks, kúres, karate, basketbol, voleıbol jáne shahmat sport túrleri qamtylǵan. Al 2025 jyldan bastap, jobaǵa ústel tennısi de qosylmaq.
Jalpy, Tımýr Qulybaev basqaratyn «Halyk» qaıyrymdylyq qory eldegi áleýmettik máselelerdi sheshýge, halyqtyń ál-aýqatyn jaqsartýǵa baǵyttalǵan jobalardy júıeli túrde júzege asyryp keledi. Aýyl sportyn órkendetýge qor 500 mıllıon teńgege jýyq qarajat bólgen.
sýretter: "Halyq" qaıyrymdylyq qory baspasózinen
